റഫ അതിര്‍ത്തി ക്രോസിംഗ് വീണ്ടും തുറക്കുന്നതുമായി ബന്ധപ്പെട്ട ഈജിപ്ഷ്യന്‍ നിര്‍ദ്ദേശങ്ങളെക്കുറിച്ച് ചര്‍ച്ച നടത്താന്‍ ഹമാസും ഫത്തബഹും. ഹമാസുമായി കെയ്‌റോയില്‍ ചര്‍ച്ച നടത്തുകയാണെന്ന് ഫലസ്തീന്‍ നാഷണല്‍ ലിബറേഷന്‍ മൂവ്‌മെന്റ് (ഫതഹ്) ഞായറാഴ്ച അറിയിച്ചു. ഗസ്സയില്‍ യുദ്ധം അവസാനിപ്പിക്കാനും പൂര്‍വ സ്ഥിതിയിലേക്ക് തിരിച്ചു വരാനും തങ്ങള്‍ അങ്ങേഅറ്റം ആഗ്രഹിക്കുന്നുണ്ടെന്നും അദ്ദേഹം വ്യക്തമാക്കി. 

ഗസ്സയേയും ഈജിപ്തിനേയും ബന്ധിപ്പിക്കുന്ന റഫ അതിര്‍ത്തി ക്രോസിങ്ങിന്റെ ഫലസ്തീനിലെ ഭാഗം ഇസ്‌റാഈല്‍ പിടിച്ചെടുത്തത് മുതല്‍ തങ്ങളുടെ ഭാഗം അടച്ചിട്ടിരിക്കുകയാണ് ഈജിപ്ത്. 

അതിനിടെ ഗസ്സയില്‍ ശക്തമായ ആക്രമണം തുടരുകയാണ് ഇസ്‌റാഈല്‍. കഴിഞ്ഞ ദിവസം നടത്തിയ ആക്രമണത്തില്‍ ഗസ്സയില്‍ ഇന്നലെ 15 പേര്‍ കൊല്ലപ്പെട്ടു. മധ്യ ഗസ്സയിലെ നുസൈറത്ത് അഭയാര്‍ഥി ക്യാംപിലാണ് പ്രധാനമായും ആക്രമണം നടന്നത്. ഇവിടെയുണ്ടായ ആക്രമണത്തില്‍ ആറു പേരും ഗസ്സ സിറ്റിയില്‍ വീടിനു നേരെ നടത്തിയ ആക്രമണത്തില്‍ മൂന്നു പേരും കൊല്ലപ്പെട്ടു. തെക്കന്‍ ഗസ്സയിലെ ഖാന്‍ യുനിസില്‍ മിസൈല്‍ ടെന്റിനു മുകളില്‍ വീണ് രണ്ടു കുട്ടികളും മരിച്ചു. റഫയില്‍ നടത്തിയ ആക്രമണത്തില്‍ നാലുപേരും കൊല്ലപ്പെട്ടു.

വടക്കന്‍ ഗസ്സയില്‍ വീടിനു നേരെ കനത്ത ബോംബാക്രമണമാണ് നടത്തിയതെന്ന് താമസക്കാര്‍ പറയുന്നു. ജബാലിയ, ബൈത്ത് ലാഹിയ, ബൈത്ത് ഹനൗന്‍ എന്നിവിടങ്ങളിലാണ് കനത്ത ആക്രമണം നടന്നത്. വടക്കന്‍ ഗസ്സ കേന്ദ്രീകരിച്ചാണ് ഇസ്‌റാഈല്‍ വംശഹത്യ ശക്തിപ്പെടുത്തുന്നത്. ഇവിടെ ബഫര്‍സോണ്‍ നിര്‍മിക്കുകയാണ് ലക്ഷ്യം. ആളുകളെ കൊന്നൊടുക്കിയാണ് ഇതിന് ഇസ്‌റാഈല്‍ സേന വഴിയൊരുക്കുന്നത്.

കഴിഞ്ഞ ദിവസം അല്‍ അദ്‌നാന്‍ ആശുപത്രിയിലെ ഐ.സി.യു മേധാവിയെ ഇസ്‌റാഈല്‍ ഹമാസ് പ്രവര്‍ത്തകനെന്ന് ആരോപിച്ച് കൊലപ്പെടുത്തിയിരുന്നു. അദ്ദേഹത്തിന്റെ കാറിനു നേരെയാണ് ആക്രമണം നടത്തിയത്.

Hamas and Fatah have held discussions in Cairo regarding Egypt's proposal to reopen the Rafah border crossing.