റിയാദ്: ജോലിക്ക് ഹാജരാകുന്നില്ല എന്ന തൊഴിലുടമയുടെ പരാതിയിൽ സഊദി ജവാസത് (പാസ്പോർട്ട് ഡയറക്ടറേറ്റ്) സ്വീകരിക്കുന്ന നിയമനടപടിയായ ‘ഹുറൂബി’ൽ അകപ്പെട്ട മുഴുവൻ വിദേശികൾക്കും സന്തോഷ വാർത്ത. ഹുറൂബ് നീക്കി പദവി ശരിയാക്കി നിയമാനുസൃതം ജോലിയിൽ തുടരാനും മറ്റൊരു തൊഴിലുടമയുടെ പേരിലേക്ക് സ്പോൺസർഷിപ്പ് മാറ്റാനും 60 ദിവസത്തെ ഇളവാണ് പ്രഖ്യാപിച്ചിട്ടുള്ളത്. 

2024 ഡിസംബർ ഒന്ന് മുതൽ 2025 ജനുവരി 29 വരെ 60 ദിവസം വരെയാണ് പദവി ശരിയാക്കാനുള്ള കാമ്പയിൻ കാലം. ഈ സമയത്തിനുള്ളിൽ ‘ഖിവ’ പോർട്ടൽ വഴി നടപടികൾ പൂർത്തിയാക്കണം. തൊഴിൽ മന്ത്രാലയത്തിെന്റെ ഖിവ പോർട്ടലാണ് ഇക്കാര്യം അറിയിച്ചത്. 2024 ഡിസംബർ ഒന്നിന് മുമ്പായി ‘ഹുറൂബാ’യവർക്കാണ് ഇളവ് ലഭിക്കുക. അതേസമയം ഗാർഹിക തൊഴിലാളികൾ ഈ ഇളവിന് അർഹരല്ല. അതല്ലാത്ത മുഴുവൻ തൊഴിൽ വിസക്കാർക്കും ഇളവ് ലഭിക്കും. ഹുറൂബായ ആളുകൾക്ക് ഇത് സംബന്ധിച്ച് ഖിവ പോർട്ടലിൽനിന്ന് അറിയിപ്പ് എസ്.എം.എസ് ലഭിച്ച് തുടങ്ങിയിട്ടുണ്ട്. മെസേജ് ലഭിക്കുന്നവർ ഖിവ പോർട്ടൽ സന്ദർശിച്ച് തുടർ നടപടികൾ സ്വീകരിക്കണം.

തൊഴിൽ, തൊഴിലുടമ ബന്ധത്തിന്റെ സുസ്ഥിരത വർധിപ്പിക്കുക, തൊഴിലാളികൾക്ക് അവരുടെ സാഹചര്യം ചട്ടങ്ങൾക്കനുസൃതമായി ക്രമപ്പെടുത്തുക, അവരുടെ സേവനങ്ങൾ മറ്റൊരു തൊഴിലുടമക്ക് കൈമാറാൻ ഒരു അധിക അവസരം നൽകുക തുടങ്ങിയവയാണ് ഈ കാമ്പയിൻ ലക്ഷ്യമിടുന്നത്. എന്നാൽ ലഭ്യമായ ഈ കാലയളവ് എല്ലാവരും പ്രയോജനപ്പെടുത്തണമെന്നും ഇനിയൊരു അവസരമുണ്ടാകില്ലെന്നും കാമ്പയിൻ സംബന്ധിച്ച സർക്കുലറിൽ പറയുന്നു. 

Saudi Arabia has announced a 60-day amnesty for people stranded in Huroub, providing them with an opportunity to resolve their status.