ലോസ് ആഞ്ചല്‍സ്: ഹോളിവുഡ് പ്രസ് അസോസിയേഷന്‍ നല്‍കിവരുന്ന ഗോള്‍ഡന്‍ ഗ്ലോബിന്റെ ഈ വര്‍ഷത്തെ പുരസ്‌കാരങ്ങള്‍ പ്രഖ്യാപിച്ചു. മ്യൂസിക്കല്‍ കോമഡി ചിത്രമായ ലാ ലാ ലാന്‍ഡ് ഏഴു പുരസ്‌കാരങ്ങള്‍ സ്വന്തമാക്കി ചരിത്രം സൃഷ്ടിച്ചു. നോമിനേഷന്‍ ലഭിച്ച ഏല്ലാ വിഭാഗത്തിലും പുരസ്‌കാരം സ്വന്തമാക്കാനും ചിത്രത്തിന് സാധിച്ചു.
ലാ ലാ ലാന്‍ഡിലെ മികച്ച കഥാപാത്രം സെബാസ്റ്റ്യനായി വേഷമിട്ട റയാന്‍ ഗോസ്‌ലിങ്(മ്യൂസിക്കല്‍ കോമഡി) മികച്ച നടനായപ്പോള്‍ ഇതേ ചിത്രത്തിലെ മിയയെ ഭാവഭദ്രമാക്കിയ എമ്മാ സ്റ്റോണ്‍(മ്യൂസിക്കല്‍ കോമഡി) മികച്ച നടിയായി. ഒരു സംഗീതജ്ഞന്റെയും നടിയുടെയും കഥ പറഞ്ഞ ചിത്രം സംവിധാനം ചെയ്ത ഡാമിയന്‍ ചാസെല്ലെ ആണ് മികച്ച സംവിധായകന്‍.
ഇതിന്റെ തിരക്കഥയ്ക്കും ചാസെല്ലെയ്ക്ക് പുരസ്‌കാരം ലഭിച്ചു. ഈ ചിത്രത്തിലെ സംഗീത സംവിധാനത്തിന് ജസ്റ്റിന്‍ ഹര്‍വിറ്റ്‌സിന് ലഭിച്ചപ്പോള്‍ മികച്ച സംഗീത-നര്‍മ പ്രാധാന്യമുള്ള ചിത്രമായി സമിതി തെരഞ്ഞെടുത്തതും ലാ ലാ ലാന്‍ഡിനെയാണ്.
അതേസമയം മികച്ച ചിത്രത്തിനുള്ള പുരസ്‌കാരം ബാരി ജെന്‍കിന്‍സിന്റെ മൂണ്‍ലൈറ്റ് സ്വന്തമാക്കി. പോള്‍ വെര്‍ഹോവന്റെ എല്ലെയാണ് മികച്ച വിദേശ ചിത്രം. കാസി അഫ്‌ളക്(ഡ്രാമ) മാഞ്ചസ്റ്റര്‍ ബൈ ദി സീയിലെ അഭിനയത്തിന് മികച്ച നടനായും ഇസബെല്ലെ ഹ്യൂപര്‍ട്ട്(ഡ്രാമ) മികച്ച നടിക്കുമുള്ള പുരസ്‌കാരം സ്വന്തമാക്കി.
സഹനടിക്കുള്ള പുരസ്‌കാരം ഫെന്‍സസിലെ മികച്ച അഭിനയത്തിന് വയോള ഡേവിസിന് ലഭിച്ചു. സൂട്ടോപ്യ ആണ് മികച്ച ആനിമേഷന്‍ ചിത്രം.