ന്യൂയോര്‍ക്ക്: 2012 ല്‍ ഒബാമ ഭരണകൂടം കൊണ്ടുവന്ന ഡിഫേര്‍ഡ് ആക്ഷന്‍ ഫോര്‍ ചൈല്‍ഡ്ഹുഡ് നിയമത്തിന്റെ അടിസ്ഥാനത്തില്‍ അമേരിക്കയില്‍ നിയമപരമായി തുടരുന്നതിന് അര്‍ഹത ലഭിച്ച 17,000 ഇന്ത്യന്‍ വിദ്യാര്‍ഥികളുടെ ഭാവിയെക്കുറിച്ച് ആശങ്കയുള്ളതായി കാലിഫോര്‍ണിയയില്‍നിന്നുള്ള ഡമോക്രാറ്റിക് സെനറ്ററും ഇന്ത്യന്‍ വംശജയുമായ കമലാഹാരിസ്.
നിയുക്ത പ്രസിഡന്റ് ഡൊണാള്‍ഡ് ട്രംപ് ഹോംലാന്റ് സെക്യൂരിറ്റി തലവനായി നിയമിച്ച റിട്ട. ജനറല്‍ ജോണ്‍ കെല്ലി സെനറ്റ് കമ്മിറ്റിക്ക് മുന്‍പില്‍ ഹാജരായപ്പോഴാണ് സെനറ്റില്‍ നവാഗതയായ കമലാ ഹാരിസ് തന്റെ ഉത്കണ്ഠ അറിയിച്ചത്.
ഒബാമ കൊണ്ടുവന്ന നിയമം റദ്ദാക്കുമെന്ന ട്രംപിന്റെ തെരഞ്ഞെടുപ്പ് വാഗ്ദാനം അതേപടി നടപ്പാക്കുമോ എന്ന ചോദ്യത്തിന് അത്രയും മുന്തിയപരിഗണന അതിന് നല്‍കുന്നില്ല' എന്നാണ് കെല്ലി പ്രതികരിച്ചത്.
80,000 രേഖകളില്ലാത്ത കുട്ടികളാണ് നിയമവിരുദ്ധമായി  കുടിയേറിയ മാതാപിതാക്കളോടൊപ്പം ഇവിടെ എത്തിച്ചേര്‍ന്നിരിക്കുന്നത്. ഇവര്‍ ഇവിടെ വിദ്യാഭ്യാസം നടത്തുകയും വിവിധ ഉയര്‍ന്ന തസ്തികകള്‍ ഉള്‍പ്പെടെ തൊഴിലെടുക്കുന്നവരുമാണ്. ഇന്ത്യയില്‍നിന്നുള്ള 17,000 വിദ്യാര്‍ഥികളില്‍ 3,608 പേര്‍ മാത്രമേ ഡി.എ.സി.എ നിയമത്തിന്റെ ആനുകൂല്യം വേണമെന്ന് ആവശ്യപ്പെട്ട് ഇതുവരെ അപേക്ഷ നല്‍കിയിട്ടുള്ളൂ എന്ന് കമല ഹാരിസ് വെളിപ്പെടുത്തി.
80,000 കുട്ടികള്‍ ഉള്‍പ്പെടെ 11 ദശലക്ഷം പേരാണ് അമേരിക്കയിലേക്ക് ആവശ്യമായ യാത്രാ രേഖകളില്ലാതെ കുടിയേറിയിരിക്കുന്നത്. ഇവരില്‍ ഗുരുതരമായ കുറ്റകൃത്യങ്ങള്‍ നടത്തിയവരെ പുറത്താക്കുമെന്ന് ട്രംപ് വ്യക്തമാക്കിയിരുന്നു.