കോഴിക്കോട്: 'ഹെല്‍ത്തി കേരള' കാംപയിനിന്റെ ഭാഗമായി ജില്ലയിലെ നഗര-ഗ്രാമ പ്രദേശങ്ങളില്‍ നടത്തിയ പരിശോധനയില്‍ സിഗരറ്റും മറ്റ് പുകയില ഉല്‍പന്നങ്ങളും പ്രൊഡക്ട് ആക്ട് പ്രകാരം പിടികൂടി. വിവിധ ടീമുകളുടെ നേതൃത്വത്തിലായിരുന്നു പരിശോധന.
83 ടീമുകളായി 244 ജീവനക്കാര്‍ 1286 കടകളും 83 ഇതരസംസ്ഥാന തൊഴിലാളി ക്യാംപുകളും പരിശോധിച്ചു. ഇതില്‍ 316 കടകളിലും അഞ്ച് ഇതരസംസ്ഥാന തൊഴിലാളി ക്യാംപുകളിലും നോട്ടിസ് നല്‍കുകയും 160 പേരില്‍ നിന്നായി 31400 രൂപ പിഴ ഈടാക്കുകയും ചെയ്തു.
കോര്‍പറേഷന്‍ പരിധിയില്‍ മെഡിക്കല്‍ കോളജ് ഉള്‍പ്പെടെയുള്ള വിദ്യാഭ്യാസ സ്ഥാപനങ്ങള്‍, കോടതികള്‍, പത്രസ്ഥാപനങ്ങള്‍, വിദ്യാഭ്യാസ സ്ഥാപനങ്ങളുടെ നൂറുമീറ്റര്‍ ചുറ്റളവിലുള്ള കടകള്‍ എന്നിവിടങ്ങളില്‍ പരിശോധന നടത്തുന്നതിന് ജില്ലാ മെഡിക്കല്‍ ഓഫിസര്‍ ഡോ. ആര്‍.എല്‍ സരിത, അഡിഷണല്‍ ഡി.എം.ഒ ഡോ. ആശാദേവി നേതൃത്വം നല്‍കി.
മുക്കം മുനിസിപ്പാലിറ്റിയില്‍ അഡിഷണല്‍ ഡി.എം.ഒ ഡോ. രവികുമാറിന്റെയും കൊയിലാണ്ടി, വടകര മുനിസിപ്പാലിറ്റികളില്‍ ഡോ. ഡി.എം.ഒ ഡോ. ജീജ എം.പിയുടെയും നേതൃത്വത്തിലായിരുന്നു പരിശോധന. ഹെല്‍ത്ത് സൂപ്പര്‍വൈസര്‍മാരും ഹെല്‍ത്ത് ഇന്‍സ്‌പെക്ടര്‍മാരും ഗ്രാമപഞ്ചായത്ത് പ്രദേശങ്ങളില്‍ പരിശോധനയ്ക്ക് നേതൃത്വം നല്‍കി.
പുകയില ഉപയോഗം കുറച്ചുകൊണ്ടുവരുന്നതിനായി പരിശോധന ഊര്‍ജിതമാക്കുമെന്നും കുറ്റക്കാര്‍ക്കെതിരേ ശക്തമായ നടപടി സ്വീകരിക്കുമെന്നും ഡി.എം.ഒ അറിയിച്ചു.