ഫ്രാന്‍സ്‌വില്ലെ: ആഫ്രിക്കന്‍ നാഷന്‍സ് കപ്പിലെ കാലങ്ങളായുള്ള മോശം മുന്നേറ്റം സെനഗല്‍ ഇത്തവണ മായ്ക്കാനുള്ള ഒരുക്കത്തിലാണ്. സിംബാബ്‌വെയെ മറുപടിയില്ലാത്ത രണ്ടു ഗോളുകള്‍ക്ക് കീഴടക്കി അവര്‍ ക്വാര്‍ട്ടര്‍ ബര്‍ത്ത് ഉറപ്പാക്കി. നിലവില്‍ ക്വാര്‍ട്ടര്‍ ഉറപ്പിച്ച ഏക ടീമായും അവര്‍ മാറി.
2006ലെ ആഫ്രിക്കന്‍ കപ്പില്‍ നാലാം സ്ഥാനം സ്വന്തമാക്കിയ ശേഷം അവര്‍ക്ക് പിന്നീട് കാര്യമായ മുന്നേറ്റങ്ങള്‍ നടത്താന്‍ സാധിച്ചിരുന്നില്ല. അതിനിടെ നടന്ന അഞ്ചു പോരാട്ടങ്ങളില്‍ മൂന്നു തവണ ഗ്രൂപ്പ് സ്റ്റേജില്‍ പുറത്തായ സെനഗലിനു രണ്ടു തവണ യോഗ്യത നേടാനും സാധിക്കാതെ പോയി. ഇത്തവണ പക്ഷേ ലിവര്‍പൂളിന്റെ മുന്നേറ്റങ്ങളിലെ നിര്‍ണായക സാന്നിധ്യമായ സാദിയോ മാനേയുടെ മികവിലാണ് സെനഗല്‍ മുന്നേറുന്നത്. സിംബാബ്‌വെയ്‌ക്കെതിരേ സാദിയോ മാനെയും ഹെന്റി സൈവെറ്റും നേടിയ ഗോളുകളാണ് അവര്‍ക്ക് വിജയം സമ്മനാനിച്ചത്.
2002ലെ ലോകകപ്പില്‍ അത്ഭുത മുന്നേറ്റം നടത്തി ശ്രദ്ധേയരായ ടീമാണ് സെനഗല്‍. അന്നു ടീമില്‍ കളിച്ച അലിയു സിസ്സെയാണ് സെനഗലിന്റെ നിലവിലെ പരിശീലകന്‍.