മീനങ്ങാടി: മലക്കാട് സ്ത്രീ തൊഴിലാളികളുടെ കൃഷി വ്യാപകമായി നശിപ്പിച്ച സംഭവത്തില്‍ പൊലിസ് കേസെടുത്ത് അന്വേഷണം ആരംഭിച്ചു.
 മലക്കാട് വെട്ടിക്കാട്ട്കുന്ന് രവീന്ദ്രന്റെ സ്ഥലം പാട്ടത്തിനെടുത്ത് കൃഷിയിറക്കിയ ചെണ്ടക്കുനി ഏഴുംകാടില്‍ വീട്ടില്‍ പ്രേമയും പുല്‍പ്പള്ളി സ്വദേശി ബീനയുമാണ് പൊലിസില്‍ പരാതി നല്‍കിയത്.
ചേനക്കൃഷി നടത്തിയത്. 55 ചാക്ക് ചേനവിത്ത് രണ്ട് മാസം മുന്‍പാണ് പാട്ടത്തിനെടുത്ത സ്ഥലത്ത് കൃഷി ചെയ്തത്. ലക്ഷങ്ങള്‍ ചെലവഴിച്ച് നടത്തിയ കൃഷിയാണ് സാമൂഹ്യ വിരുദ്ധര്‍ പൂര്‍ണമായും വെട്ടി നശിപ്പിച്ചത്.
 കൃഷി നശിപ്പിക്കുന്നതിന് മുന്‍പ് ചേന നനച്ചു പോയതാണന്ന് പ്രേമ പരാതിയില്‍ പറയുന്നു. മീനങ്ങാടി എസ്.ഐ രാധാകൃഷ്ണന്റെ നേതൃത്വത്തില്‍ സയന്റിഫിക്ക് ഡിപ്പാര്‍ട്ട്‌മെന്റ് ഫിംഗര്‍പ്രിന്റ് ഉദ്യോഗസ്ഥര്‍ സംഭവസ്ഥലത്തെത്തി പരിശോധന നടത്തി.
കൃഷി നശിപ്പിച്ച സമയത്ത് പ്രദേശത്ത് നിന്നും ഉപയോഗിച്ച ഫോണ്‍ കോളുകള്‍ പരിശോധിക്കുന്നതിനായി സൈബര്‍ സെല്ലിന്റെ സഹായവും പൊലിസ് തേടിയിട്ടുണ്ട്.