തിരുവനന്തപുരം: ലോ അക്കാദമി വിഷയത്തില്‍ എന്‍.എസ്.എസ് നേതൃത്വം കൈവിട്ടപ്പോള്‍ ലക്ഷ്മി നായര്‍ക്ക് പിന്തുണയുമായി സമസ്ത നായര്‍ സമാജം. ലോ അക്കാദമിയില്‍ നടക്കുന്നത് ജാതി കളിയാണെന്ന ആരോപണവുമായാണ് സമാജം രംഗത്തെത്തിയത്. ലക്ഷ്മി നായരുടെ പേരിന്റെ അവസാനം നായര്‍ ഉള്ളതുകൊണ്ടാണ് ആക്രമിക്കപ്പെടുന്നതെന്നും. ജാതി പേര് വിളിച്ച് അപമാനിച്ചു എന്ന പേരില്‍ ലക്ഷ്മിനായര്‍ക്കെതിരേ കുട്ടികളെ ഉപയോഗിച്ച് കേസ് കൊടുത്തതിന് പിന്നില്‍ രാഷ്ട്രീയ പാര്‍ട്ടികളാണ്. വിദ്യാര്‍ഥികള്‍ക്ക് അഴിഞ്ഞാടാന്‍ അവസരം നല്‍കാത്തതിനാലാണ് ലോ അക്കാദമിയില്‍ സമരം ഉണ്ടായതെന്നും സമാജം ജനറല്‍ സെക്രട്ടറി ചെങ്കല്‍ ശ്രീകുമാര്‍ ആരോപിച്ചു.
പുതുതായി ആരംഭിച്ച രണ്ട് ലോ കോളജുകളുമായി ഉണ്ടാക്കിയ ധാരണയുടെ അടിസ്ഥാനത്തില്‍ ലക്ഷ്മി നായര്‍ നടത്തുന്ന ലോ കോളജിനെ തകര്‍ക്കണം. അതിനുള്ള സഹായമാണ് രാഷ്ട്രീയ പാര്‍ട്ടികള്‍ ചെയ്യുന്നതെന്നും നേതാക്കള്‍ വാര്‍ത്താ സമ്മേളനത്തില്‍ ആരോപിച്ചു. പ്രസിഡന്റ് മണക്കാട് സുരേന്ദ്രന്‍ പങ്കെടുത്തു. സമരം രൂക്ഷമായതോടെ അടുത്തിടെ പ്രിന്‍സിപ്പല്‍ ലക്ഷ്മി നായര്‍ പെരുന്നയില്‍ എത്തി എന്‍.എസ്.എസ് ജനറല്‍ സെക്രട്ടറി ജി സുകുമാരന്‍ നായരെ കണ്ട് സഹായം തേടിയിരുന്നു.