ലണ്ടന്‍: ആഴ്‌സണലിനെ സ്വന്തം തട്ടകമായ സ്റ്റാംഫോര്‍ഡ് ബ്രിഡ്ജില്‍ തകര്‍ത്ത് ചെല്‍സി ബഹുദൂരം മുന്നില്‍. ഒന്നിനെതിരേ മൂന്നു ഗോളുകള്‍ക്കാണ് ഒന്നാം സ്ഥാനക്കാര്‍ തകര്‍പ്പന്‍ വിജയം സ്വന്തമാക്കിയത്.
13ാം മിനുട്ടില്‍ മാര്‍ക്കോ അലോണ്‍സോയുടെ ഗോളില്‍ മുന്നില്‍ കടന്ന ചെല്‍സിക്കായി 53ാം മിനുട്ടില്‍ ഹസാദും 85ാം മിനുട്ടില്‍ ഫാബ്രിഗസുമാണു വല ചലിപ്പിച്ചത്. ആഴ്‌സണലിന്റെ ആശ്വാസ ഗോള്‍ ഒലിവര്‍ ജിറൂദ് 90ാം മിനുട്ടില്‍ നേടി. ജയത്തോടെ ചെല്‍സിക്ക് 59 പോയിന്റ്. രണ്ടാം സ്ഥാനത്തുള്ള ടോട്ടനവുമായി 12 പോയിന്റ് വ്യത്യാസത്തിലാണു ചെല്‍സിയുടെ കുതിപ്പ്.
എഫ്.എ കപ്പിലും ലീഗ് കപ്പിലും തുടരുന്ന കഷ്ടകാലം പ്രീമിയര്‍ ലീഗിലും ലിവര്‍പൂളിനെ പിന്തുടരുന്നു. ഹള്‍ സിറ്റി അവരെ 2-0ത്തിനു അട്ടിമറിച്ചു. മറ്റൊരു മത്സരത്തില്‍ അവസാന സ്ഥാനത്തുള്ള സണ്ടര്‍ലാന്‍ഡ് എവേ പോരാട്ടത്തില്‍ നാലു ഗോളുകള്‍ അടിച്ചുകൂട്ടി ക്രിസ്റ്റല്‍ പാലസിനെ തുരത്തി. എവര്‍ട്ടന്‍ 6-3നു ബോണ്‍മൗത്തിനേയും വെസ്റ്റ് ഹാം യുനൈറ്റഡ് 3-1നു സതാംപ്ടനേയും വാട്‌ഫോര്‍ഡ് 2-1നു ബേണ്‍ലിയേയും വെസ്റ്റ് ബ്രോംവിച് 1-0ത്തിനു സ്റ്റോക് സിറ്റിയേയും കീഴടക്കി. എവര്‍ട്ടനു വേണ്ടി റൊമേലു ലുകാകു നാലു ഗോളുകള്‍ അടിച്ചുകൂട്ടി.

ബാഴ്‌സലോണയ്ക്ക് വിജയം
മാഡ്രിഡ്: സ്പാനിഷ് ലാ ലിഗയില്‍ ബാഴ്‌സലോണയ്ക്ക് വിജയം. മറുപടിയില്ലാത്ത മൂന്നു ഗോളുകള്‍ക്ക് അവര്‍ അത്‌ലറ്റിക്ക് ബില്‍ബാവോയെ വീഴ്ത്തി. മറ്റൊരു മത്സരത്തില്‍ മലാഗയെ എസ്പാന്യോള്‍ 1-0ത്തിനു പരാജയപ്പെടുത്തി. ബാഴ്‌സയ്ക്കായി മെസ്സി, അല്‍ക്കാസര്‍, അലക്‌സിസ് വിദാല്‍ വല ചലിപ്പിച്ചു.

സമനിലയില്‍
കുരുങ്ങി ബയേണ്‍
മ്യൂണിക്ക്: ജര്‍മന്‍ ബുണ്ടസ് ലീഗയില്‍ ഒന്നാം സ്ഥാനത്തുള്ള ബയേണ്‍ മ്യൂണിക്കിനെ ഷാല്‍ക്കെ സമനിലയില്‍ കുരുക്കി. സ്വന്തം തട്ടകത്തില്‍ 1-1നാണ് ബാവേറിയന്‍സ് സമനില വഴങ്ങിയത്. മറ്റു മത്സരങ്ങളില്‍ ഹോഫെന്‍ഹെയിം 4-0ത്തിനു മെയ്ന്‍സിനേയും കൊളോണ്‍ 1-0ത്തിനു വോള്‍വ്‌സ്ബര്‍ഗിനേയും ബൊറൂസിയ മോണ്‍ചെന്‍ഗ്ലേഡ്ബാച് 3-0ത്തിനു ഫ്രീബര്‍ഗിനേയും ഹാംബര്‍ഗര്‍ 1-0ത്തിനു ബയര്‍ ലെവര്‍കൂസനേയും പരാജയപ്പെടുത്തി.