മുക്കം: കയ്യിട്ടാപൊയിലില്‍ നടന്നുവരുന്ന ബീവറേജ് വിരുദ്ധ ഇരിപ്പുസമരത്തിന് പിന്തുണയുമായി കുമാരനെല്ലൂര്‍ ആസാദ് മെമ്മോറിയല്‍ യു.പി സ്‌കൂള്‍ വിദ്യാര്‍ഥികള്‍ സമരപന്തലിലെത്തി. സയന്‍സ്, സാമൂഹ്യ ക്ലബുകളുടെ ആഭിമുഖ്യത്തിലുള്ള വിദ്യാര്‍ഥികളാണ് സമരത്തിന് ഐക്യദാര്‍ഢ്യം പ്രഖ്യാപിച്ച് സമരപന്തലിലെത്തിയത്. ഒരാഴ്ചയായി സമരത്തിലിരിക്കുന്ന ആക്ഷന്‍ കമ്മിറ്റി ഭാരവാഹികള്‍ക്കും നാട്ടുകാര്‍ക്കും വിദ്യാര്‍ഥികളെത്തിയത് ആവേശമായി. വിനോദ് കുമാര്‍ മാമ്പറ്റ, ജെമി ജെയിംസ് കൂടരഞ്ഞി, കെ.പി ഷിംന എന്നിവരുടെ നേതൃത്വത്തിലാണ് വിദ്യാര്‍ഥികളെത്തിയത്. സമരസമിതി ചെയര്‍മാന്‍ ബ്രജേഷ്, കണ്‍വീനര്‍ രവീന്ദ്രന്‍ ഇടക്കണ്ടിയില്‍, ട്രഷറര്‍ രാജീവ് കുമാര്‍ കെ.എസ് എന്നിവരുടെ നേതൃത്വത്തില്‍ അധ്യാപകരെയും വിദ്യാര്‍ഥികളെയും സ്വീകരിച്ചു.