HOME
DETAILS

കരാറുകാരനില്‍ നിന്ന് കൈക്കൂലി; മരാമത്ത് എന്‍ജിനീയര്‍ക്കും ഡ്രൈവര്‍ക്കും സസ്‌പെന്‍ഷന്‍

  
backup
February 07 2017 | 19:02 PM

%e0%b4%95%e0%b4%b0%e0%b4%be%e0%b4%b1%e0%b5%81%e0%b4%95%e0%b4%be%e0%b4%b0%e0%b4%a8%e0%b4%bf%e0%b4%b2%e0%b5%8d%e2%80%8d-%e0%b4%a8%e0%b4%bf%e0%b4%a8%e0%b5%8d%e0%b4%a8%e0%b5%8d-%e0%b4%95%e0%b5%88

തിരുവനന്തപുരം: സെക്രട്ടേറിയറ്റ് മുറ്റത്ത് വച്ച് കരാറുകാരനില്‍ നിന്ന് കൈക്കൂലി വാങ്ങുന്നതിനിടെ സി.സി ടി.വിയില്‍ കുടുങ്ങിയ പൊതുമരാമത്ത് വകുപ്പ് എന്‍ജിനീയറെയും ഡ്രൈവറെയും സസ്‌പെന്‍ഡ് ചെയ്തു. ഇലക്ട്രിക്കല്‍ വിഭാഗം എക്‌സിക്യൂട്ടീവ് എന്‍ജിനീയര്‍ ഷഹാന ബീഗം, ഡ്രൈവര്‍ എ.ജെ പ്രവീണ്‍കുമാര്‍ എന്നിവരാണ് കൈക്കൂലി വാങ്ങുന്നതിനിടെ സി.സി ടി.വി കാമറയില്‍ കുടുങ്ങിയത്. കരാറുകാരനില്‍ നിന്ന് കൈക്കൂലി വാങ്ങിയതായി കണ്ടെത്തിയതിനെ തുടര്‍ന്ന് ഇരുവരെയും സസ്‌പെന്‍ഡ് ചെയ്തതായി പൊതുമരാമത്ത്് മന്ത്രി ജി സുധാകരന്‍ അറിയിച്ചു.
അഴിമതിക്കെതിരേ സര്‍ക്കാര്‍ ശക്തമായ മുന്നറിയിപ്പ് നല്‍കിവരുന്നതിനിടെയാണ് സെക്രട്ടേറിയറ്റില്‍ വച്ച് ഉദ്യോഗസ്ഥ കൈക്കൂലി വാങ്ങിയത്.
കഴിഞ്ഞ വെള്ളിയാഴ്ച വൈകിട്ട് 5.30 ഓടെ സെക്രട്ടേറിയറ്റിലെ അഗ്‌നിശമന സംവിധാനങ്ങള്‍ പരിശോധിക്കാന്‍ ഔദ്യോഗിക വാഹനത്തില്‍ എത്തിയതായിരുന്നു എക്‌സിക്യൂട്ടീവ് എന്‍ജിനീയര്‍.
തിരികെ പോകാന്‍ ഒരുങ്ങുന്നതിനിടെയാണ് കരാറുകാരന്‍ ഉദ്യോഗസ്ഥയെ സമീപിക്കുന്നത്. കാര്യം പറഞ്ഞു നില്‍ക്കുന്നതിനിടെ എന്‍ജിനീയര്‍ക്ക് കരാറുകാരനും ഡ്രൈവര്‍ക്ക് കൂടെയുള്ള മറ്റൊരാളും പണം കൈമാറി. കൈക്കൂലി വാങ്ങിയതായി പരാതി ഉയര്‍ന്നതോടെ മന്ത്രിയുടെ നിര്‍ദേശ പ്രകാരം വിജിലന്‍സ് വിഭാഗം സി.സി ടി.വി ദൃശ്യങ്ങള്‍ പരിശോധിച്ചു. തെളിവുകള്‍ ലഭിച്ചതോടെ ഇരുവരേയും സസ്‌പെന്‍ഡ് ചെയ്തു. കൈക്കൂലി നല്‍കിയ കരാറുകാരന്‍ സിജോക്കും കൂടെയുണ്ടായിരുന്നവര്‍ക്കും എതിരേ കേസെടുക്കാനും മന്ത്രി നിര്‍ദേശം നല്‍കി.



Comments (0)

Disclaimer: "The website reserves the right to moderate, edit, or remove any comments that violate the guidelines or terms of service."