കൊല്ലം: കോവൂര്‍ കുഞ്ഞുമോന്‍ എം.എല്‍.എ എന്‍.സി.പി മന്ത്രിയാകുന്നതിനോട് യോജിപ്പില്ലെന്ന് ആര്‍.എസ്.പി (എല്‍) സംസ്ഥാന സെക്രട്ടറി തേവലക്കര ബലദേവ് വാര്‍ത്താസമ്മേളനത്തില്‍ പറഞ്ഞു.
എന്‍.സി.പിയുമായി മന്ത്രിസ്ഥാനത്തെപ്പറ്റി ചര്‍ച്ച ചെയ്തിട്ടില്ല. എന്‍.സി.പിക്ക് കുഞ്ഞുമോനെ മന്ത്രിയാക്കാന്‍ താല്‍പര്യമുള്ളതായി അനൗദ്യോഗികമായി അറിയിപ്പുകള്‍ ലഭിക്കുന്നുണ്ട്.
22നും 23നും നടക്കുന്ന പാര്‍ട്ടി സംസ്ഥാന സെക്രട്ടേയറ്റിലും സംസ്ഥാന കമ്മിറ്റിയിലും ഇക്കാര്യങ്ങള്‍ ചര്‍ച്ചചെയ്യുമെന്നും ബലദേവ് പറഞ്ഞു.
കോവൂര്‍ കുഞ്ഞുമോന് ആര്‍.എസ്.പി ലെനിനിസ്റ്റുമായി ബന്ധമില്ലെന്ന അമ്പലത്തറ ശ്രീധരന്‍നായരുടെ വാദം അടിസ്ഥാന രഹിതമാണ്. കഴിഞ്ഞ നവംബറില്‍ ആലപ്പുഴയില്‍ നടന്ന സംസ്ഥാന കമ്മിറ്റിയില്‍ അമ്പലത്തറ ശ്രീധരന്‍നായരെ പാര്‍ട്ടിയില്‍നിന്ന് പുറത്താക്കിയതായും അദ്ദേഹം പറഞ്ഞു.
എന്നാല്‍, താന്‍ എന്‍.സി.പി മന്ത്രിയാകുന്നുവെന്നുള്ള മാധ്യമ വാര്‍ത്തകള്‍ അടിസ്ഥാനരഹിതമാണെന്ന് കോവൂര്‍ കുഞ്ഞുമോന്‍ സ്വകാര്യചാനലിനോട് വ്യക്തമാക്കി.