കാഞ്ഞങ്ങാട്: സ്വര്‍ണം നല്‍കാമെന്ന് പറഞ്ഞ ശേഷം പണം വാങ്ങി വിശ്വാസ വഞ്ചന നടത്തിയെന്ന കേസില്‍ പ്രധാന പ്രതി പൊലിസ് പിടിയിലായി. തളിപ്പറമ്പ് പട്ടുവം സ്വദേശിയും തൃക്കരിപ്പൂരില്‍ താമസക്കാരനുമായ ഉറുമി മുസ്തഫ (57) യെയാണ് ഹൊസ്ദുര്‍ഗ് പൊലിസ് അറസ്റ്റ് ചെയ്തത്. കാഞ്ഞങ്ങാട് റെയില്‍വേ സ്റ്റേഷനില്‍ വച്ചാണ് ഇയാളെ പൊലിസ് പിടികൂടിയത്.
തളിപ്പറമ്പിലെ കള്ളനോട്ട് കേസ്, കാസര്‍കോട്-കണ്ണൂര്‍ ജില്ലകളില്‍ തട്ടിപ്പു കേസുകള്‍,സി.ബി.ഐ ചമഞ്ഞ് തട്ടിപ്പ് നടത്തിയതുള്‍പ്പെടെ നിരവധി കേസുകള്‍ ഇയാളുടെ പേരിലുണ്ടെന്ന് പൊലിസ് പറഞ്ഞു.
സ്വര്‍ണം വാങ്ങി നല്‍കാമെന്ന് പറഞ്ഞ് മലപ്പുറം സ്വദേശി നാലകത്ത് ഫാസിലില്‍ നിന്നും 28 ലക്ഷം രൂപ തട്ടിയെടുത്തുവെന്ന കേസിലാണ് ഇപ്പോള്‍ മുസ്തഫയെ അറസ്റ്റ് ചെയ്തത്. ബംഗളൂരുവിലെ ഒരു വ്യാപാരിയില്‍ നിന്ന് സ്വര്‍ണം വാങ്ങി നല്‍കാമെന്നു പറഞ്ഞാണ് മുസ്തഫയും സംഘവും ഫാസിലിന്റെ പക്കല്‍ നിന്ന് ഈ മാസം ഒന്നിന് കാഞ്ഞങ്ങാട് വച്ച് പണം കൈപ്പറ്റിയത്.
നഗരത്തിലെ ഒരു ഹോട്ടലില്‍ വച്ച് മുസ്തഫയും ആലുവ സ്വദേശി ആന്റണി പോളും അരീക്കോട് സ്വദേശി ഫൈസലും ചേര്‍ന്ന് പണം വാങ്ങിയെന്നും തുടര്‍ന്ന് തന്നെയും കൊണ്ട് അജ്ഞാത കേന്ദ്രത്തില്‍ പോവുകയും അവിടെ വച്ച് സംഘം മുങ്ങിയെന്നുമാണ് ഫാസിലിന്റെ പരാതി. മുസ്തഫയെ കോടതിയില്‍ ഹാജരാക്കി റിമാന്‍ഡ് ചെയ്തു. സംഘത്തിലെ മറ്റു രണ്ടുപേരെ പൊലിസ് അന്വേഷിച്ചു വരുന്നുണ്ട്.