ദോഹ: 2022ലെ ലോകകപ്പ് ഫുട്‌ബോളിനുള്ള ഒരുക്കങ്ങള്‍ക്കായി ഓരോ ആഴ്ചയും ഖത്തര്‍ ചെലവാക്കുന്നത് 500 ദശലക്ഷം ഡോളര്‍ വീതം. ഫുട്‌ബോള്‍ ടൂര്‍ണമെന്റിനു വേണ്ടിയുള്ള പ്രധാന അടിസ്ഥാന സൗകര്യ വികസനത്തിനാണ് ഇത്രയും തുക ചെലവാക്കുന്നതെന്ന് ഖത്തര്‍ ധനമന്ത്രി അലി ശരീഫ് അല്‍ ഇമാദി പറഞ്ഞു. 2021വരെ ഇതു തുടരുമെന്നും അദ്ദേഹം വ്യക്തമാക്കി.
ലോകകപ്പുമായി ബന്ധപ്പെട്ട പദ്ധതി പ്രവര്‍ത്തനങ്ങള്‍ വിലയിരുത്തുന്നതിന് അന്താരാഷ്ട്ര മാധ്യമപ്രവര്‍ത്തകര്‍ക്കായി ഒരുക്കിയ പ്രത്യേക യാത്രയില്‍ സംസാരിക്കുകയായിരുന്നു അലി ശരീഫ് അല്‍ ഇമാദി. ഫിഫ ലോകകപ്പിന്റെ ഒരുക്കങ്ങള്‍ക്കായി മൊത്തം 20,000 കോടി ഡോളറിലേറെ ചെലവ് വരുമെന്നാണ് ഖത്തര്‍ പ്രതീക്ഷിക്കുന്നത്. സ്റ്റേഡിയങ്ങളുടെ നിര്‍മാണം, റോഡുകള്‍, പുതിയ വിമാനത്താവളം, ആശുപത്രികള്‍ തുടങ്ങിയവയുടെ ചെലവ് അടങ്ങുന്നതാണു തുക. 2022ലേക്കുള്ള 90 ശതമാനം കരാറുകളും ഇതിനകം നല്‍കിക്കഴിഞ്ഞതായി അല്‍ ഇമാദി വ്യക്തമാക്കി. ഹൈവേകള്‍, റെയില്‍, തുറമുഖങ്ങള്‍ തുടങ്ങിയവയുടെ പണികളെല്ലാം പുരോഗമിക്കുകയാണ്.
എണ്ണവിലയിടിവുമായി ബന്ധപ്പെട്ട ചെലവുചുരുക്കലില്‍നിന്ന് ലോകകപ്പ് പദ്ധതികളെ ഒഴിവാക്കിയിട്ടുണ്ട്. നിലവിലുള്ള എണ്ണവില ഖത്തറിനെ സംബന്ധിച്ചിടത്തോളം തൃപ്തികരമാണെന്നും അല്‍ഇമാദി അറിയിച്ചു.