കൊച്ചി: മഞ്ചേശ്വരം നിയമസഭാ മണ്ഡലത്തിലെ തെരഞ്ഞെടുപ്പ് റദ്ദാക്കാന്‍ ബി.ജെ.പി നേതാവ് കെ സുരേന്ദ്രന്‍ നല്‍കിയ ഹരജിയില്‍ 69 പേര്‍ക്ക് കൂടി സമന്‍സ് അയക്കാന്‍ ഹൈക്കോടതി നിര്‍ദേശിച്ചു. ഹരജിയില്‍ കഴിഞ്ഞ ദിവസം സമര്‍പ്പിച്ച 26 പേരുടെ പട്ടികയ്ക്ക് പുറമേ ഹര്‍ജിക്കാരന്‍ 69 പേരുടെ പട്ടിക ഇന്നലെ ഹാജരാക്കിയിരുന്നു. തുടര്‍ന്നാണ് സമന്‍സ് നല്‍കാന്‍ നിര്‍ദേശിച്ചത്. മഞ്ചേശ്വരത്ത് യു.ഡി.എഫ് സ്ഥാനാര്‍ഥിയായി മത്സരിച്ചു വിജയിച്ച പി.ബി അബ്ദുല്‍ റസാഖിനോട് 89 വോട്ടുകള്‍ക്കാണ് സുരേന്ദ്രന്‍ പരാജയപ്പെട്ടത്. കള്ളവോട്ടു നടന്നെന്ന് ആരോപിച്ചാണ് കെ.സുരേന്ദ്രന്‍ ഹരജി നല്‍കിയത്.