ന്യൂഡല്‍ഹി: അയോഗ്യരാക്കിയ ആം ആദ്മി എം.എല്‍.എമാരുടെ വാദം കേള്‍ക്കേണ്ട ബാധ്യത തങ്ങള്‍ക്കില്ലെന്ന് തെരഞ്ഞെടുപ്പ് കമ്മിഷന്‍.
ഡല്‍ഹി ഹൈക്കോടതിയില്‍ തെരഞ്ഞെടുപ്പ് കമ്മിഷന്‍ ഫയല്‍ ചെയ്ത സത്യവാങ്മൂലത്തിലാണ് ഇക്കാര്യം അറിയിച്ചത്. അയോഗ്യരാക്കിയ 20 എം.എല്‍.എമാര്‍ക്ക് വിശദീകരണം നല്‍കാന്‍ ആവശ്യമായ സമയം നല്‍കിയെന്നും എന്നാല്‍ അവര്‍ അനാവശ്യ പ്രതികരണം മാത്രമാണ് നല്‍കിയതെന്നും തെരഞ്ഞെടുപ്പ് കമ്മിഷന്‍ കോടതിയെ ബോധിപ്പിച്ചു.
തെരഞ്ഞെടുപ്പ് കമ്മിഷന്‍ തങ്ങളുടെ വാദം കേട്ടില്ലെന്ന് പറഞ്ഞ് എട്ട് എം.എല്‍.എമാര്‍ നല്‍കിയ ഹരജിയിലാണ് കോടതി കമ്മിഷന്റെ വിശദീകരണം തേടിയത്. ഹരജിയില്‍ കോടതി തീര്‍പ്പ് കല്‍പ്പിക്കുംവരെ 20 നിയമസഭാ മണ്ഡലങ്ങളിലും ഉപതെരഞ്ഞെടുപ്പ് നടത്തരുതെന്ന് കോടതി ഉത്തരവിട്ടു.
കേസിന്റെ തുടര്‍നടപടികള്‍ ഇനി ബുധനാഴ്ചയാണ് പരിഗണിക്കുന്നത്. അയോഗ്യരാക്കപ്പെട്ടവര്‍ ഇരട്ടപ്പദവി വഹിച്ചുവെന്ന് ചൂണ്ടിക്കാണിച്ചാണ് ഇവരെ തെരഞ്ഞെടുപ്പ് കമ്മിഷന്റെ നിര്‍ദേശപ്രകാരം രാഷ്ട്രപതി അയോഗ്യരാക്കിയത്. അയോഗ്യരാക്കിയ എം.എല്‍.എമാരെ മന്ത്രിമാരുടെ പാര്‍ലമെന്റ് സെക്രട്ടറിയായി നിയമിച്ചതാണ് തിരിച്ചടിയായത്.
ഇരട്ടപ്പദവി വഹിച്ചെന്ന കാര്യം ചൂണ്ടിക്കാട്ടി എം.എല്‍.എമാരെ അയോഗ്യരാക്കണമെന്ന് ജനുവരി 19നാണ് തെരഞ്ഞെടുപ്പ് കമ്മിഷന്‍ രഷ്ട്രപതിയോട് ശുപാര്‍ശ ചെയ്തത്. എന്നാല്‍ അയോഗ്യരാക്കിയ എം.എല്‍.എമാരുടെ വാദം കേള്‍ക്കാതെ തീരുമാനം എടുത്ത തെരഞ്ഞെടുപ്പ് കമ്മിഷന്റെ നടപടിക്കെതിരേ നിരവധി വിമര്‍ശനങ്ങള്‍ ഉയര്‍ന്നിരുന്നു.