ഇംഗ്ലണ്ടിനെതിരായ രണ്ടാം ടെസ്റ്റിൽ തകർപ്പൻ റെക്കോർഡ് സ്വന്തമാക്കി ഇന്ത്യൻ വൈസ് ക്യാപ്റ്റൻ റിഷബ് പന്ത്. ഇംഗ്ലണ്ടിനെതിരെ സിക്സർ മഴ പെയ്യിച്ചാണ് പന്ത് പുതിയ നേട്ടത്തിലെത്തിയത്. ടെസ്റ്റ് ക്രിക്കറ്റിൽ വിദേശ മണ്ണിൽ ഏറ്റവും കൂടുതൽ സിക്സുകൾ നേടുന്ന താരമായാണ് പന്ത് മാറിയത്. ഇംഗ്ലണ്ടിന്റെ മണ്ണിൽ ഇതുവരെ പന്ത് 23 സിക്സുകളാണ് നേടിയിട്ടുള്ളത്.

സൗത്ത് ആഫ്രിക്കയിൽ 22 സിക്സുകൾ പറത്തിയ ഇംഗ്ലീഷ് നായകൻ ബെൻ സ്റ്റോക്സിന്റെ പേരിലായിരുന്നു ഈ റെക്കോർഡ് ഇതിനു മുമ്പ് ഉണ്ടായിരുന്നത്. ആദ്യ ഇന്നിങ്സിൽ ഒരു സിക്‌സും രണ്ടാം ഇന്നിങ്സിൽ മൂന്ന് സിക്സുമാണ് താരം നേടിയത്. രണ്ടാം ഇന്നിങ്സിൽ അർദ്ധ സെഞ്ച്വറി നേടിയാണ് പന്ത് തിളങ്ങിയത്. 58 പന്തിൽ എട്ട് ഫോറുകളും മൂന്ന് സിക്സുകളും ഉൾപ്പടെ 65 റൺസാണ് പന്ത് നേടിയത്.  

രണ്ടാം ഇന്നിങ്സിൽ ഇന്ത്യ 427 റൺസിന്‌ ആറ് വിക്കറ്റുകൾ എന്ന നിലയിൽ ഡിക്ലയർ ചെയ്യുകയായിരുന്നു. ഇംഗ്ലണ്ടിന്റെ മുന്നിൽ ഇന്ത്യ 608 എന്ന റൺസിന്റെ കൂറ്റൻ ടോട്ടലാണ് പടുത്തുയർത്തിയത്. ഇന്ത്യക്കായി ക്യാപ്റ്റൻ ശുഭ്മൻ ഗിൽ സെഞ്ച്വറി നേടി തിളങ്ങി. 161 പന്തിൽ 162 റൺസുമാണ് ഇന്ത്യൻ നായകൻ നേടിയത്. 13 ഫോറുകളും എട്ട് സിക്സുകളുമാണ് ഗിൽ നേടിയത്. കെഎൽ രാഹുൽ അർദ്ധ സെഞ്ച്വറിയും നേടി.   84 പന്തിൽ 55 റൺസ് നേടിയാണ് രാഹുൽ തിളങ്ങിയത്. 10 ഫോറുകളാണ് രാഹുൽ നേടിയത്. 

ആദ്യ ഇന്നിങ്സിൽ ഇന്ത്യ 587 റൺസിനാണ് പുറത്തായത്. ഗിൽ ഡബിൾ സെഞ്ച്വറി നേടിയും യശ്വസി ജെയ്‌സ്വാൾ, രവീന്ദ്ര ജഡേജ എന്നിവർ അർദ്ധ സെഞ്ച്വറിയും മികച്ച ടോട്ടൽ നേടുന്നതിൽ നിർണായകമായി.107 പന്തിൽ 87 റൺസാണ് ജെയ്‌സ്വാൾ നേടിയത്. 13 ഫോറുകളും ഒരു സിക്‌സും അടങ്ങുന്നതായിരുന്നു താരത്തിന്റെ പ്രകടനം. 137 പന്തിൽ 10 ഫോറുകളും ഒരു സിക്‌സും അടക്കം 89 റൺസാണ് ജഡേജ സ്വന്തമാക്കിയത്.

അതേസമയം ഒന്നാം ഇന്നിങ്സിൽ ഇംഗ്ലണ്ട് 407 റൺസിനാണ് പുറത്തായത്. ഇംഗ്ലണ്ട് ബാറ്റിംഗ് നിരയിൽ ജാമി സ്മിത്തും ഹാരി ബ്രൂക്കും സെഞ്ച്വറി നേടി മികച്ച പ്രകടനമാണ് പുറത്തെടുത്തത്. 207 പന്തിൽ പുറത്താവാതെ 184 റൺസ് ആണ് ജാമി നേടിയത്. 21 ഫോറുകളും നാല് സിക്സുകളും അടങ്ങുന്നതായിരുന്നു താരത്തിന്റെ പ്രകടനം. 234 പന്തിൽ 17 ഫോറുകളും  ഒരു സിക്സും അടക്കം 158 റൺസ് ആണ് ബ്രുക് അടിച്ചെടുത്തത്. 

ഇന്ത്യൻ ബൗളിങ്ങിൽ ആറ് വിക്കറ്റുകൾ നേടിയ മുഹമ്മദ് സിറാജാണ് ഇംഗ്ലണ്ടിനെ തകർത്തത്. ആകാശ് ദീപ് നാല് വിക്കറ്റുകളും സ്വന്തമാക്കി. 

Rishabh Pant Breaks Ben Stokes Record in Test Cricket