കോട്ടയം: കോട്ടയം മെഡിക്കല്‍ കോളജില്‍ ഉണ്ടായ അപകടത്തെ തുടര്‍ന്ന് ആരോഗ്യമന്ത്രി വീണാ ജോര്‍ജിന്റെ രാജി ആവശ്യപ്പെട്ടവര്‍ക്കെതിരെ രൂക്ഷ വിമര്‍ശനവുമായി മന്ത്രി വി.എന്‍ വാസവന്‍. 'കെട്ടിടം ആരോഗ്യമന്ത്രി വന്ന് ഉരുട്ടിയിട്ടതോ തള്ളിയിട്ടതോ അല്ലല്ലോ,' എന്ന് അദ്ദേഹം പരിഹസിച്ചു.

ALSO READ: കോട്ടയം മെഡിക്കൽ കോളേജ് അപകടം: ബിന്ദുവിന്റെ വീട് നവീകരണത്തിന് ഉടൻ ധനസഹായം; മന്ത്രി ആർ. ബിന്ദു

'കര്‍ണാടകയില്‍ ക്രിക്കറ്റ് താരങ്ങള്‍ക്കുള്ള സ്വീകരണത്തിനിടെ 11 പേര്‍ മരിച്ച അപകടത്തില്‍ ഏതെങ്കിലും മന്ത്രി രാജിവെക്കണമെന്ന് ആവശ്യപ്പെട്ടിട്ടുണ്ടോ? വിമാനാപകടമുണ്ടായാല്‍ പ്രധാനമന്ത്രി രാജിവെക്കണമെന്നോ, വാഹനാപകടമുണ്ടായാല്‍ ഗതാഗത മന്ത്രി രാജിവെക്കണമെന്നോ പറയുമോ?' മന്ത്രി ചോദിച്ചു. അപകടം നിര്‍ഭാഗ്യകരവും വേദനാജനകവുമാണെന്ന് അംഗീകരിച്ച അദ്ദേഹം, ഇനി ഇത്തരം സംഭവങ്ങള്‍ ആവര്‍ത്തിക്കാതിരിക്കാന്‍ ആവസ്യമായ എല്ലാ നടപടികളും സ്വീകരിച്ചതായി വ്യക്തമാക്കി.

ALSO READ: മന്ത്രി വീണ ജോര്‍ജിനെതിരേ നാടെങ്ങും പ്രതിഷേധം; പലയിടത്തും സംഘര്‍ഷം

വിമര്‍ശനം ഉന്നയിക്കുന്ന ചാണ്ടി ഉമ്മന്റെ പിതാവ് ഉമ്മന്‍ ചാണ്ടി മുഖ്യമന്ത്രിയായിരുന്നപ്പോള്‍ കെട്ടിടം ശോചനീയാവസ്ഥയിലാണെന്ന റിപ്പോര്‍ട്ട് ലഭിച്ചിരുന്നുവെന്ന് മന്ത്രി വാസവന്‍ ചൂണ്ടിക്കാട്ടി. 'അന്ന് യുഡിഎഫ് സര്‍ക്കാര്‍ ഒന്നും ചെയ്തില്ല. എല്‍ഡിഎഫ് സര്‍ക്കാര്‍ അധികാരത്തില്‍ വന്ന ശേഷം ആവശ്യമായ തുക വകയിരുത്തി, നാല് പുതിയ കെട്ടിടങ്ങള്‍ നിര്‍മിച്ചു,' അദ്ദേഹം പറഞ്ഞു.

അപകടത്തില്‍ മരിച്ചവരുടെ കുടുംബങ്ങള്‍ക്ക് അടുത്ത മന്ത്രിസഭാ യോഗത്തിനു ശേഷം ധനസഹായം പ്രഖ്യാപിക്കുമെന്നും മന്ത്രി അറിയിച്ചു.