പെരിയ: ഉദുമ ഗവ ആര്‍ട്‌സ് ആന്‍ഡ് സയന്‍സ് കോളജില്‍ ക്ലാസുകള്‍ സസ്‌പെന്‍ഡ് ചെയ്ത പ്രിന്‍സിപ്പലിന്റെ നടപടിയില്‍ എം.എസ്.എഫ്, കെ.എസ്.യു, എ.ബി.വി.പി നേതാക്കള്‍ പ്രതിഷേധിച്ചു. മൂന്നാം വര്‍ഷ ബി.കോം, ഇംഗ്ലീഷ് വിഭാഗത്തിന്റെ ക്ലാസുകളാണ് അന്യായമായി പ്രിന്‍സിപ്പല്‍ തടഞ്ഞു വച്ചതെന്നു നേതാക്കള്‍ ആരോപിച്ചു. കോളജില്‍ ഒരു ക്ലാസില്‍ പുതുതായി സ്ഥാപിച്ച ഫാനുകള്‍ നശിപ്പിച്ച നിലയില്‍ കണ്ടെത്തിയിരുന്നു. ഇതുമായി ബന്ധപ്പെട്ടു കോളജ് പ്രിന്‍സിപ്പാള്‍ ബേക്കല്‍ പൊലിസില്‍ പരാതി നല്‍കിയതായും പറയുന്നു.
എന്നാല്‍ മൂന്നാം വര്‍ഷ ബി.കോം, ഇംഗ്ലീഷ്  വിഭാഗം വിദ്യാര്‍ഥികളും കഴിഞ്ഞ രണ്ടു വര്‍ഷത്തിലധികമായി ഉപയോഗിച്ച് വരുന്ന ക്ലാസ് മുറി ഒഴിവാക്കി ഇപ്പോള്‍ ഫാന്‍ നശിപ്പിച്ച മുറിയിലേക്ക് മാറണമെന്ന് പ്രിന്‍സിപ്പാള്‍ വിദ്യാര്‍ഥികളോട് പറഞ്ഞതോടെ ഇത് അനുസരിക്കാന്‍ ഇവര്‍ തയാറായില്ല. ഇതേ തുടര്‍ന്നു കഴിഞ്ഞ ദിവസം ക്‌ളാസുകള്‍ സസ്‌പെന്‍ഡ് ചെയ്തതായി അറിയിക്കുകയായിരുന്നുവെന്നു വിദ്യാര്‍ഥികള്‍ പറഞ്ഞു.
ഇന്നലെ ഉച്ചക്ക് പ്രിന്‍സിപ്പാളും വിദ്യാര്‍ഥി നേതാക്കളും ചര്‍ച്ച നടത്തിയെങ്കിലും പ്രിന്‍സിപ്പാളിന്റെ ക്ലാസ് മാറണമെന്ന ഉപാധി പിന്‍വലിക്കാത്തതിനെ തുടര്‍ന്ന് ചര്‍ച്ച അലസിയതായി വിദ്യാര്‍ഥികള്‍ പറഞ്ഞു.