കണ്ണൂര്‍: വേനലവധിയുടെ ആലസ്യത്തില്‍ നിന്ന് കുട്ടികള്‍ നാളെ സ്‌കൂളിലേക്ക്. ജില്ലയില്‍ നാളെ നടക്കുന്ന പ്രവേശനോത്സവം ഗംഭീരമാക്കാന്‍ വിപുലമായ ഒരുക്കങ്ങളാണ് ജില്ലാ വിദ്യാഭ്യാസ വകുപ്പ് പൂര്‍ത്തിയാക്കിയിരിക്കുന്നത്. ജില്ലാതല പ്രവേശനോത്സവം തലശേരി വലിയമാടാവില്‍ ഗവണ്‍മെന്റ് യു.പി സ്‌കൂളില്‍ എ.എന്‍ ഷംസീര്‍ എം.എല്‍.എ ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് കെ.വി സുമേഷ് അധ്യക്ഷനാവും. മുഴുവന്‍ ഒരുക്കങ്ങളും    പൂര്‍ത്തീകരിച്ചാണ് ഇക്കുറി പ്രവേശനോത്സവം സംഘടിപ്പിക്കുന്നതെന്നതാണ് പ്രത്യേകത.
സ്‌കൂളുകളുടെ അറ്റകുറ്റ പണികള്‍ പൂര്‍ണമായും പൂര്‍ത്തീകരിച്ചു. അധ്യാപക പരിശീലനം നൂറു ശതമാനത്തിലെത്തിക്കാനായി. വിദ്യാര്‍ഥികളുടെ യൂനിഫോമുകള്‍, ടീച്ചേഴ്‌സ് ഗ്രാന്റ്, മെയിന്റനന്‍സ് ഗ്രാന്റ്, സ്‌കൂള്‍ ഗ്രാന്റ് എന്നിവ നേരത്തെ സ്‌കൂള്‍ അധികൃതര്‍ക്ക് കൈമാറിക്കഴിഞ്ഞിരുന്നു. മുഴുവന്‍ ക്ലാസുകളിലേക്കുമുള്ള പാഠപുസ്തകങ്ങള്‍ എത്തിയിട്ടുണ്ട്. സ്‌കൂള്‍ തുറന്ന് ഒരാഴ്ച്ചക്കകം തന്നെ ജില്ലയിലെ മുഴുവന്‍ സ്‌കൂളുകളിലും പാഠപുസ്തകം എത്തിക്കാന്‍ കഴിയും. പ്രവേശനോത്സവത്തിന്റെ ഭാഗമായി പ്രസംഗങ്ങള്‍ കുറച്ച് സ്‌കൂള്‍ അന്തരീക്ഷവുമായി പൊരുത്തപ്പെടുന്ന രീതിയിലുള്ള മത്സരങ്ങളും കലാപരിപാടികളുമായിട്ടായിരിക്കും സ്‌കൂളിലേക്ക് നവാഗതരെ സ്വീകരിക്കുക. എല്ലാ സ്‌കൂളുകളിലും മധുരപലഹാര വിതരണവും നടക്കും.