പട്ടിക്കാട്: ഗവ. ഹയര്‍ സെക്കന്‍ഡറി സ്‌കൂളില്‍ കഴിഞ്ഞവര്‍ഷം പ്രവര്‍ത്തനമാരംഭിച്ച പുതിയ കെട്ടിടത്തിന്റെ നിര്‍മാണത്തില്‍ അപാകതയെന്ന് പരാതി. അഡ്വ. എം ഉമ്മര്‍ എം.എല്‍.എയുടെ പ്രാദേശിക വികസന ഫണ്ടില്‍ നിന്ന് ഒരുകോടി രൂപ ചെലവഴിച്ചു നിര്‍മിച്ച കെട്ടിടമാണിത്. നിര്‍മാണത്തിലെ അപാകതമൂലം മേല്‍ക്കൂരയിലെ കോണ്‍ക്രീറ്റ് അടര്‍ന്നു വീഴുന്നതായി അധ്യാപകരും വിദ്യാര്‍ഥികളും പറയുന്നു.
സ്‌കൂള്‍ സ്റ്റാഫ് റൂം, പ്ലസ് വണ്‍, പ്ലസ് ടു ക്ലാസുകള്‍ എന്നിവ ഈ കെട്ടിടത്തിലാണ് പ്രവര്‍ത്തിക്കുന്നത്. നേരത്തെ, പ്ലസ് ടു ഹ്യൂമാനിറ്റീസ് വിദ്യാര്‍ഥിനിയുടെ ദേഹത്ത് കോണ്‍ക്രീറ്റ് പാളി അടര്‍ന്നു വീണ് പരുക്കേറ്റിരുന്നു. മണലിനു പകരം പാറപ്പൊടി ഉപയോഗിച്ചതും വേണ്ടവിധത്തില്‍ നയ്ക്കാത്തതും തറയും മേല്‍ക്കൂരയും അടരാന്‍ കാരണമായതായി പറയുന്നു.
അതേസമയം, കെട്ടിടം നിര്‍മിക്കേണ്ട ചുമതല ബന്ധപ്പെട്ട കമ്മിറ്റിയ്ക്കും എന്‍ജിനീയര്‍ക്കുമായിരുന്നെന്നും അപാകതയുണ്ടെങ്കില്‍ പരിഹാര നടപടിയുണ്ടാകുമെന്നും എം.എല്‍.എ പ്രതികരിച്ചു.