തൈക്കാട്: ശക്തമായ കാറ്റില്‍ തെങ്ങ് കടപുഴകി വീണു. പാലുവായ് ഒമ്പതാം വാര്‍ഡ് ശാന്തിനഗറില്‍ ചുഴലി വീട്ടില്‍ രാജന്റെ ഓടിട്ട വീടിനു മുകളിലേക്കാണ് അയല്‍വാസിയുടെ തെങ്ങ് കടപുഴകി വീണത്. ഉച്ചക്ക് 12 മണിയോടെയാണ് ശക്തമായ കാറ്റ് വീശിയത്. ഈ സമയം ഭാര്യ ശ്രീജ അടുക്കള പണിയിലും ഒന്നര വയസുള്ള കുട്ടി വരാന്തയില്‍ കളിക്കുകയായിരുന്നു. രാജന്‍ വീട്ട് മുറ്റത്ത് തന്നെ ആശാരിപണിയിലും ആയിരുന്നു. ഭാഗ്യം കൊണ്ടാണ് വീട്ടുകാര്‍ രക്ഷപ്പെട്ടത്. മുന്‍വശത്തെ ഓടും ചുമരും തകര്‍ന്ന നിലയിലാണ്. സംഭവം അറിഞ്ഞ് തൈക്കാട് വില്ലേജ് ഓഫിസര്‍ രാജന്‍, കൗണ്‍സിലര്‍മാരായ ബിന്ദു അജിത്ത്, നിര്‍മ്മല കേരളന്‍, പൊതുപ്രവര്‍ത്തകന്‍ ഹീറോ ബായ് എന്നിവര്‍ സ്ഥലത്തെത്തി നടപടികള്‍ സ്വീകരിച്ചു. കാലാവസ്ഥ വ്യതിയാനത്തിന്റെ ഭാഗമായി ദിവസങ്ങളായി ശക്തമായ കാറ്റ് ആഞ്ഞടിക്കുക പതിവായിരിക്കുകയാണ്.