മനില: ഫിലിപ്പൈന്‍സില്‍ പ്രസിഡന്റ് റോഡ്രിഗോ ഡ്യുറ്റര്‍ട്ടോയുടെ മയക്കുമരുന്ന് വിരുദ്ധ വേട്ടയുടെ പേരില്‍ നടക്കുന്ന കൊലപാതകങ്ങള്‍ക്കെതിരേ പ്രതിഷേധം. കത്തോലിക്കാ മതവിഭാഗമാണ് പ്രതിഷേധം സംഘടിപ്പിച്ചത്. ലൂയിസ് അന്റോണിയോ ടാഗ്ലെ ആയിരങ്ങള്‍ അണിനിരന്ന പ്രതിഷേധപ്രകടനത്തിന് നേതൃത്വം നല്‍കി.
ജീവിതത്തിന് വേണ്ടിയുള്ള നടത്തം എന്നാണ് റാലിയെ പ്രതിഷേധക്കാര്‍ വിശേഷിപ്പിച്ചത്. 20,000 പേര്‍ പ്രതിഷേധ പ്രകടനത്തില്‍ പങ്കെടുത്തതായി സമരക്കാര്‍ അവകാശപ്പെട്ടു. ഡ്യുറ്റെര്‍ട്ടെയുടെ ഭരണത്തിന് കീഴില്‍ ഇതുവരെ മയക്കുമരുന്ന് വിരുദ്ധ നിയമപ്രകാരം 7000 പേരാണ് കൊല്ലപ്പെട്ടത്. മനുഷ്യത്വരഹിമായ കൊലപാതകങ്ങളെ വിശ്വാസികളായ കത്തോലിക്കാവിഭാഗം അംഗീകരിക്കില്ലെന്ന് മനില ബിഷപ്പ് ബ്രോഡെറിക് പാബില്ലോ പറഞ്ഞു. മയക്കുമരുന്ന് കേസില്‍ ശിക്ഷിക്കപ്പെട്ടവര്‍ക്ക് വധശിക്ഷ നല്‍കുന്ന രീതിയെയും സഭ എതിര്‍ക്കുന്നതായി പ്രതിഷേധക്കാര്‍ വ്യക്തമാക്കി.
അതേസമയം കത്തോലിക്കാ സഭയുടെ നടപടികള്‍ രാജ്യത്തിന്റെ താല്‍പര്യവുമായി യോജിച്ച് പോകുന്നതല്ലെന്ന് ഡ്യുറ്റെര്‍ട്ടെ പറഞ്ഞു. അസംബന്ധമാണ് ആചാരങ്ങള്‍ പിന്തുടരുന്നവരാണ് അവര്‍. രാജ്യത്തെ ബാധിച്ച മയക്കുമരുന്നെന്ന വിപത്തിനെ തുടച്ചുനീക്കാനുള്ള ശ്രമത്തെ അവര്‍ ഇല്ലാതാക്കുകയാണെന്നും ഡ്യുറ്റെര്‍ട്ടെ കുറ്റപ്പെടുത്തി.