പനമരം: പനമരത്തുണ്ടായ കാട്ടുതീയില്‍ കര്‍ഷകന്റെ നാല് ഏക്കര്‍ കൃഷിയിടം കത്തിനശിച്ചു. പനമരം പഞ്ചായത്തിലെ മാത്തൂര്‍-പരിയാരം പത്മനാഭന്‍ നമ്പ്യാരുടെ തോട്ടത്തിനാണ് ഇന്നലെ ഉച്ചക്ക് 12 മണിയോടെ തീ പിടിച്ചത്.
തോട്ടത്തിലെ ഒരുഭാഗത്ത് തീ പടരുന്നത് പ്രദേശവാസികളുടെ ശ്രദ്ധയില്‍പ്പെട്ടിരുന്നു. തീയണക്കാന്‍ നാട്ടുകാര്‍ ശ്രമിച്ചെങ്കിലും തോട്ടം ഉണങ്ങിനില്‍ക്കുന്നതിനാല്‍ തീ തോട്ടമാകെ പടര്‍ന്നുപിടിക്കുകയായിരുന്നു.
ഫയര്‍ഫോഴ്‌സ് എത്തിയപ്പോഴേക്കും തോട്ടത്തിന്റെ പകുതിഭാഗം കത്തിയിരുന്നു. ഫയര്‍ഫോഴ്‌സും നാട്ടുകാരും മണിക്കൂറുകളോളം പരിശ്രമിച്ചാണ് തീയണച്ചത്. എന്നാല്‍ അഞ്ച് മണിയോടെ പഞ്ചായത്ത് റോഡിനോട് ചേര്‍ന്ന ഭാഗത്ത് വീണ്ടും തീ പടര്‍ന്നത് പ്രദേശവാസികളെ പരിഭ്രാന്തരാക്കി. ഇതിനു തൊട്ടടുത്തായി നിരവധി വീടുകള്‍ സ്ഥിതിചെയ്യുന്നുണ്ട്. മാനന്തവാടി യൂനിറ്റിലെ ഫയര്‍ഫോഴ്‌സ് വീണ്ടും ആറ് മണിയോടെ എത്തിയാണ് തീയണച്ചത്.