കിളിമാനൂര്‍: വണ്ടന്നൂര്‍ മഠത്തില്‍ കുന്നില്‍ നിരവധി കേസുകളിലെ പ്രതി വിദ്യാര്‍ഥിയെ കുത്തിപ്പരുക്കേല്‍പ്പിച്ചു. കിളിമാനൂര്‍ വണ്ടന്നൂര്‍ മഠത്തില്‍കുന്നില്‍ ജ്യോതി-ഗിരിജ ദമ്പതികളുടെ മകന്‍ അജയ് (17) ക്കാണ് കഴുത്തില്‍ കുത്തേറ്റത്. ഇന്നലെ രാത്രി എട്ടു മണിയോടെ യാണ് സംഭവം. കൊലപാതകം അടക്കം നിരവധി കേസുകളില്‍ പ്രതി പപ്പു എന്ന് വിളിക്കുന്ന സുമോദ് ആണ് കുത്തിയത്.സുമോദിന്റെ നിരന്തരമുള്ള ശല്യം സഹിക്കവയ്യാതെ ചുറ്റുവട്ടത്തുള്ളവര്‍ ചേര്‍ന്ന് പിടികൂടി പൊലിസില്‍ ഏല്‍പ്പിക്കാന്‍ ശ്രമിക്കുന്നതിനിടയില്‍ അജയിയെ കുത്തിയ ശേഷം സുമോദ് രക്ഷപ്പെടുകയായിരുന്നു. ഇരുവരും അടുത്ത ബന്ധുക്കളാണ്.പരുക്കേറ്റ അജയയിയെ വെഞ്ഞാറമൂടിലെ സ്വകാര്യ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. കിളിമാനൂര്‍ പൊലിസ് കേസെടുത്തു.