മുംബൈ: നഗരത്തിലെ രണ്ടിടങ്ങളിലായുണ്ടായ തീപിടിത്തത്തില്‍ മൂന്നുപേര്‍ മരിച്ചു. മുംബൈ അന്ധേരിയിലാണ് ഒരു സംഭവമെങ്കില്‍ മറ്റൊന്ന് നവി മുംബൈയിലെ ഐരോളിയിലായിരുന്നു. ഐരോളിയില്‍ താമസ സ്ഥലത്തുണ്ടായ തീപിടിത്തത്തില്‍ യുവതിയും ഇവരുടെ മകളുമാണ് മരിച്ചത്. ഇവര്‍ താമസിച്ചിരുന്നതിന് താഴെയുള്ള ഒരു കടയില്‍ നിന്ന് തീപടര്‍ന്നായിരുന്നു അപകടം. അന്ധേരിയിലുണ്ടായ അപകടത്തില്‍ മരിച്ചത് 30കാരനാണ്. തീപിടിച്ച കടയില്‍ നിന്ന് രക്ഷപ്പെടാനാകാതെ ഉള്ളില്‍ അകപ്പെട്ടായിരുന്നു ഇയാളുടെ മരണമെന്ന് പൊലിസ് പറഞ്ഞു. രണ്ടിടങ്ങളിലേയും തീപിടിത്തത്തിനുള്ള കാരണം വ്യക്തമായിട്ടില്ല.