തൃശൂര്‍: വര്‍ഗീയ ഫാസിസ്റ്റ് ശക്തികളും നവ ലിബറല്‍ നയങ്ങളും രാജ്യത്തിനു ഭീഷണി സൃഷ്ടിക്കുമ്പോള്‍ ഇടതു, മതേതര ശക്തികള്‍ കരുത്തോടെ മുന്നോട്ടുപോകേണ്ടതുണ്ടെന്ന് വി.എസ് അച്യുതാനന്ദന്‍. സി.പി.എം സംസ്ഥാനസമ്മേളനത്തിന്റെ പ്രതിനിധി സമ്മേളന നഗരിയില്‍ പതാക ഉയര്‍ത്തി സംസാരിക്കുകയായിരുന്നു അദ്ദേഹം.
രാജ്യം അതീവ ഗൗരവതരമായ രാഷ്ട്രീയ സാഹചര്യത്തിലൂടെയാണ് കടന്നുപോകുന്നത്. ഈ ഘട്ടത്തില്‍ ഇടതു, മതേതര സഖ്യം ശക്തിപ്പെടേണ്ടത് പ്രധാനമാണ്. കേരളത്തിലെ എല്‍.ഡി.എഫ് സര്‍ക്കാര്‍ നവകേരളം സൃഷ്ടിക്കാന്‍ പ്രതിജ്ഞാബദ്ധമായി പ്രവര്‍ത്തിക്കുകയാണ്. സര്‍ക്കാരിനെതിരേ സ്ഥാപിത താല്‍പര്യക്കാര്‍ തെറ്റായ പ്രചാരണങ്ങള്‍ അഴിച്ചുവിടുന്നു. ഇതിനെ ചെറുത്തുതോല്‍പിക്കാന്‍ സമ്മേളനത്തിനു കഴിയണമെന്നും വി.എസ് പറഞ്ഞു.