മുംബൈ: പ്രിയങ്കാ ഗാന്ധി രാഷ്ട്രീയത്തിലേക്ക് പ്രവേശിക്കുവാന്‍ കാത്തിരിക്കുകയാണ് താനെന്ന് പട്ടീദാര്‍ അനാമത് ആന്തോളന്‍ സമിതി നേതാവ് ഹര്‍ദ്ദിക് പട്ടേല്‍.
രാഹുല്‍ തന്റെ നേതാവല്ലെന്നും പ്രിയങ്കയക്ക് വേണ്ടിയാണ് താന്‍ കാത്തിരിക്കുന്നതെന്നും ഹര്‍ദ്ദിക് പട്ടേല്‍ വ്യക്തമാക്കി.
വ്യക്തിപരമായി രാഹുല്‍ ഗാന്ധിയെ എനിക്കിഷ്ടമാണ്. പക്ഷെ, ഒരു നേതാവെന്ന നിലയില്‍ രാഹുലിനെ എനിക്ക് അംഗീകരിക്കാനാകില്ല- ഹര്‍ദ്ദിക് പറയുന്നു. മുംബൈയില്‍ ഒരു പൊതുപരിപാടിക്കിടെ സംസാരിക്കുകയായിരുന്നു അദ്ദേഹം.
2019 ലെ ലോക്‌സഭാ തെരഞ്ഞെടുപ്പില്‍ മത്സരിക്കാനില്ലെന്നും ഹര്‍ദ്ദിക് വ്യക്തമാക്കി.
തെരഞ്ഞെടുപ്പില്‍ മത്സരിക്കാനുള്ള പ്രായം ഇതുവരെ തനിക്കായിട്ടില്ലെന്നും ഹര്‍ദ്ദിക് പറയുന്നു. എന്നാല്‍ മത്സരിക്കാനുള്ള പ്രായം തനിക്കായിക്കഴിഞ്ഞാല്‍ തന്നെ ഒരു കാരണവശാലും ആര്‍ക്കും തടയാന്‍ കഴിയില്ലെന്നും ഹര്‍ദ്ദിക് അഭിപ്രായപ്പെട്ടു.
നിയമസഭയിലേക്കോ, പാര്‍ലമെന്റിലേക്കോ ആയിക്കോട്ടെ, തെരഞ്ഞെടുപ്പില്‍ മത്സരിക്കുമ്പോള്‍ ജനത്തിന്റെ വികാരമാണ് ഉള്‍ക്കൊള്ളേണ്ടതെന്നും അദ്ദേഹം പറഞ്ഞു.
കഴിഞ്ഞ ഗുജറാത്ത് തെരഞ്ഞെടുപ്പില്‍ പ്രായപരിധിയില്‍ താഴെയായതിനാല്‍ ഹര്‍ദ്ദിക് പട്ടേലിന് മത്സരിക്കാന്‍ കഴിഞ്ഞിരുന്നില്ല.
ഗുജറാത്തിലെ പട്ടീദാര്‍ സമുദായത്തിനുവേണ്ടി പ്രവര്‍ത്തിക്കുന്ന ഹര്‍ദ്ദിക് ഗുജറാത്ത് തെരഞ്ഞെടുപ്പ് കാലത്താണ് കോണ്‍ഗ്രസിന് പിന്തുണ അറിയിച്ചത്.