കണ്ണൂര്‍: എടയന്നൂരിലെ യൂത്ത് കോണ്‍ഗ്രസ് നേതാവ് ശുഹൈബിനെ വെട്ടിയ വാള്‍ എന്ന നിലയില്‍ പൊലിസ് കണ്ടെടുത്ത വാളുകളെ കുറിച്ചു ദുരൂഹത. കണ്ടെടുത്ത വാളുകള്‍ ശുഹൈബിനെ വെട്ടിനുറുക്കാന്‍ ഉപയോഗിച്ച വാളല്ലെന്ന് സാക്ഷികളായ നൗഷാദും റിയാസും തിരിച്ചറിഞ്ഞിട്ടുണ്ടെന്ന് കെ.സുധാകരന്‍ പറഞ്ഞു. ഇരുന്നുവെട്ടി മാംസം പോലും ചിതറിക്കുന്ന തരത്തില്‍ നീളം കുറഞ്ഞ മഴു പോലുള്ള ആയുധമാണ് ഉപയോഗിച്ചത്. കൊലയാളികളുടെ പണിയായുധം എവിടെയെങ്കിലും ഉപേക്ഷിക്കുമെന്ന് വിശ്വസിക്കുന്നില്ലെന്നും കെ.സുധാകരന്‍ പറഞ്ഞു. കാരണം അത് അവര്‍ക്ക് ആവശ്യമുള്ള ആയുധമാണ്. അന്വേഷണം വഴിതെറ്റിക്കാന്‍ സി.പി.എം ശ്രമിക്കുന്നു എന്നതിന് തെളിവാണ് കൊണ്ടിടുന്ന വാളുകളെന്നും സുധാകരന്‍ പറഞ്ഞു. അതേസമയം പിടികൂടിയ 71 സെന്റീമീ റ്റര്‍ നീളത്തിലുള്ള വാളുകള്‍ മൂന്നും അടുത്തിടെയാണ് നിര്‍മിച്ചതെന്നു പൊലിസ് അറിയിച്ചു.
വാളില്‍ രക്തക്കറയും മണ്ണും പുരണ്ട നിലയിലാണ്. റോഡരികിലെ കശുമാവിന്‍ തോട്ടത്തില്‍ വാളുകള്‍ കണ്ടതിനാല്‍ പ്രതികള്‍ കൃത്യം നടത്തിയ ശേഷം വലിച്ചെറിഞ്ഞതാകാമെന്നാണ് പൊലിസ് കരുതുന്നത്.