കൊച്ചി: ഫ്യൂച്ചര്‍ കബഡി ഹീറോസ് പരിപാടിയുടെ ആദ്യ ഘട്ട തിരഞ്ഞെടുപ്പ് തൃശൂരില്‍ നടക്കും. ഫെബ്രുവരി 26ന് മുംബൈയില്‍ ആരംഭിച്ച ആദ്യ ഘട്ട തിരഞ്ഞെടുപ്പിന്റെ തുടര്‍ച്ചയാണിത്. തൃശൂര്‍, കോയമ്പത്തൂര്‍, ചെന്നൈ, നാഗ്പൂര്‍, ചണ്ഡീഗഢ്, ബംഗളൂരു, ന്യൂഡല്‍ഹി, ലഖ്‌നൗ, വിശാഖപട്ടണം, പട്‌ന, ഹൈദരാബാദ്, ഇന്‍ഡോര്‍, ഇംഫാല്‍, ജയ്പൂര്‍, ഭുവനേശ്വര്‍, അഹമദാബാദ് നഗരങ്ങളിലാണ് കബഡി താരങ്ങളെ തിരഞ്ഞെടുക്കാനായുള്ള പരിപാടികള്‍ നടത്തുന്നത്. വിവോ പ്രോ കബഡി ലീഗിനുള്ള ലേലത്തിന് വഴിയൊരുക്കും വിധം കബഡി താരങ്ങളെ തിരഞ്ഞെടുക്കുന്ന ഫ്യൂച്ചര്‍ കബഡി ഹീറോസ് പരിപാടിക്ക് കഴിഞ്ഞ വര്‍ഷമായിരുന്നു തുടക്കം കുറിച്ചത്. 4600 പേര്‍ പങ്കെടുത്തതില്‍ നിന്ന് 133 താരങ്ങളെയാണ് കഴിഞ്ഞ വര്‍ഷം തിരഞ്ഞെടുത്തത്. ഇത്തവണ എ.കെ.എഫ്.ഐ, സംസ്ഥാന കബഡി ഫെഡറേഷനുകള്‍ എന്നിവയുമായി ചര്‍ച്ച ചെയ്ത് പരിപാടി കൂടുതല്‍ പ്രദേശങ്ങളിലേക്ക് വ്യാപിപ്പിച്ചിരിക്കുകയാണ്. ഇംഫാല്‍, തൃശൂര്‍, ഭുവനേശ്വര്‍, അഹമ്മദാബാദ്, പട്‌ന എന്നിവയാണ് പുതിയ കേന്ദ്രങ്ങള്‍.