ഡര്‍ബന്‍: ദക്ഷിണാഫ്രിക്കയ്‌ക്കെതിരായ ഒന്നാം ക്രിക്കറ്റ് ടെസ്റ്റിന്റെ ആദ്യ ദിനത്തില്‍ സന്ദര്‍ശകരായ ആസ്‌ത്രേലിയ പൊരുതുന്നു. വെളിച്ച കുറവ് മൂലം കളി നിര്‍ത്തി വയ്ക്കുമ്പോള്‍ ആസ്‌ത്രേലിയ അഞ്ച് വിക്കറ്റ് നഷ്ടത്തില്‍ 225 റണ്‍സെന്ന നിലയില്‍. 21 റണ്‍സുമായി ടിം പെയ്‌നും 32 റണ്‍സുമായി മിച്ചല്‍ മാര്‍ഷുമാണ് ക്രീസില്‍.
ടോസ് നേടി ബാറ്റിങ് തിരഞ്ഞെടുത്ത ആസ്‌ത്രേലിയ തുടക്കത്തില്‍ പതറി. 39 റണ്‍സ് ചേര്‍ക്കുന്നതിനിടെ രണ്ട് വിക്കറ്റ് നഷ്ടമായ അവര്‍ക്ക് പിന്നീട് വാര്‍ണര്‍, ക്യാപ്റ്റന്‍ സ്മിത്ത് എന്നിവര്‍ നേടിയ അര്‍ധ സെഞ്ച്വറികളാണ് രക്ഷയായത്. വാര്‍ണര്‍ 51ഉം സ്മിത്ത് 56ഉം റണ്‍സെടുത്തു. 40 റണ്‍സുമായി ഷോണ്‍ മാര്‍ഷും പിടിച്ചുനിന്നു. ദക്ഷിണാഫ്രിക്കയ്ക്കായി ഫിലാന്‍ഡര്‍, കേശവ് മഹാരാജ് എന്നിവര്‍ രണ്ട് വീതം വിക്കറ്റുകളും റബാഡ ഒരു വിക്കറ്റുമെടുത്തു.