കണ്ണൂര്‍: മട്ടന്നൂരിലെ യൂത്ത് കോണ്‍ഗ്രസ് നേതാവ് ശുഹൈബിന്റെ വധവുമായി ബന്ധപ്പെട്ട് ഒരാള്‍ കൂടി അറസ്റ്റിലായി. പാലയോട് സ്വദേശി സംഗീതിനെയാണ് പൊലിസ് അറസ്റ്റ് ചെയ്തത്. ഇതോടെ കേസില്‍ അറസ്റ്റിലായവരുടെ എണ്ണം എട്ടായി.

ശുഹൈബിനെ വകവരുത്തിയ അക്രമികള്‍ ഉപയോഗിച്ച ആയുധം ഒളിപ്പിച്ചതാണ് സഞ്ജയുടെ കേസിലെ പങ്കാളിത്തം. തെരൂര്‍ പാലയോട് സ്വദേശികളായ സഞ്ജയ് (24), കെ. രജത് (22) എന്നിവര്‍ ഇന്നലെ അറസ്റ്റിലായിരുന്നു. അറസ്റ്റിലായ രജതിനെ ചോദ്യം ചെയ്യുകയാണെന്നും കോടതിയില്‍ ഇന്ന് ഹാജരാക്കുമെന്നും പൊലിസ് പറഞ്ഞു. ശുഹൈബ് തട്ടുകടയിലുണ്ടെന്ന വിവരം ആക്രമിസംഘത്തിന് കൈമാറിയത് രജത് ആണെന്നാണ് അന്വേഷണസംഘത്തിന് ലഭിച്ച വിവരം.