തൃശ്ശൂര്‍: സ്വകാര്യ ആശുപത്രിയിലെ നഴ്‌സുമാര്‍ സംസ്ഥാന വ്യാപകമായി വീണ്ടും അനിശ്ചിതകാല സമരത്തിലേക്ക്. മാര്‍ച്ച് ആറാം തിയ്യതി മുതല്‍ സംസ്ഥാനത്തുള്ള എല്ലാ ആശുപത്രികളിലെയും നഴ്‌സുമാര്‍ അനിശ്ചിതകാലം ലീവെടുത്ത് സമരം ചെയ്യുമെന്ന് നഴ്‌സസ് അസോസിയേഷനായ യു.എന്‍.എ അറിയിച്ചു. സംസ്ഥാന വ്യാപകമായി 62,000ത്തോളം നഴ്‌സുമാരാണ് സമരത്തില്‍ പങ്കെടുക്കുന്നത്. നഴ്‌സിങിലെ എല്ലാ മേഖലയില്‍ നിന്നും ലീവെടുക്കുമെന്നും യു.എന്‍.എ അറിയിച്ചു.

കഴിഞ്ഞ വര്‍ഷമുണ്ടായ സമരത്തെ തുടര്‍ന്ന് ജൂലൈ 20ന് സുപ്രിം കോടതി അടിസ്ഥാന ശമ്പളം 20,000 രൂപയാക്കി പ്രഖ്യാപിച്ചിരുന്നു. എന്നാല്‍, ഈ ശമ്പളം നല്‍കാന്‍ ഇതുവരെ പൂര്‍ണമായും ആശുപത്രി അധികൃതരും തയ്യാറായിട്ടില്ലെന്ന് യു.എന്‍.എ പറഞ്ഞു. സുപ്രിം കോടതിയുടെ ഉത്തരവ് നടപ്പിലായോ എന്ന് സര്‍ക്കാരോ അതിനു ബന്ധപ്പെട്ടവരോ പരിശോധിക്കാന്‍ തയ്യാറായിട്ടില്ല. ഇതില്‍ നിന്നും മാനേജ്‌മെന്റുകളെ സഹായിക്കുന്ന നിലപാടാണ് സര്‍ക്കാരിന്റേതെന്ന് വ്യക്തമാണ്. മാര്‍ച്ച് അഞ്ചു മുതല്‍ പ്രഖ്യാപിച്ചിരുന്ന സമരം ഹൈക്കോടതി ഉത്തരവിനെ തുടര്‍ന്ന് പിന്‍വലിച്ചിരുന്നു. സുപ്രിം കോടതിയുടെ ഉത്തരവ് നടപ്പാക്കിയോ എന്ന് പരിശോധിക്കാതെയാണ് സമരം പിന്‍വലിക്കാന്‍ കോടതി ഉത്തരവിട്ടത്. ഹൈക്കോടതിയുടെ ഈ നടപടി തീര്‍ത്തും ദൗര്‍ഭാഗ്യകരമായിപ്പോയതായി യു.എന്‍.എ അധികൃതര്‍ പറഞ്ഞു.

എന്നാല്‍, ഈ മാസം മുതല്‍ അടിസ്ഥാനശമ്പളം 20,000 ആക്കി ഉയര്‍ത്തുമെന്ന് അറിയിക്കുന്ന ആശുപത്രികളെ സമരത്തില്‍ നിന്നും ഒഴിവാക്കുമെന്നും യുണൈറ്റഡ് നഴ്‌സസ് അസോസിയേഷന്‍ പ്രതിനിധികള്‍ പറഞ്ഞു.