ക്വലാലംപൂര്‍: സുല്‍ത്താന്‍ അസ്‌ലന്‍ ഷാ കപ്പ് ഹോക്കി പോരാട്ടത്തില്‍ ഇന്ത്യക്ക് സമനില. രണ്ടാം മത്സരത്തില്‍ ഇന്ത്യ ഇംഗ്ലണ്ടുമായി 1-1ന് സമനിലയില്‍ പിരിഞ്ഞു. ഒരു ഗോളിന് മുന്നിലെത്തിയ ശേഷമാണ് ഇന്ത്യ വിജയിക്കാമായിരുന്ന പോരാട്ടത്തില്‍ സമനില വഴങ്ങിയത്. കളിയുടെ 14ാം മിനുട്ടില്‍ ഷിലാനന്ദ് ലക്‌റ നേടിയ ഗോളില്‍ ഇന്ത്യ മുന്നിലെത്തി. രമണ്‍ദീപ് സിങിന്റെ ക്രോസില്‍ നിന്ന് തല്‍വിന്ദര്‍ സിങ് പോസ്റ്റിലേക്ക് പന്ത് പായിച്ചെങ്കിലും ഇംഗ്ലണ്ട് ഗോള്‍ കീപ്പര്‍ അത് തടുത്തു. റീബൗണ്ടായി വന്ന പന്ത് ഗോളിലേക്ക് തിരിച്ചുവിട്ടാണ് ലക്‌റ ഗോള്‍ നേടിയത്. കളിയുടെ അവസാന ക്വാര്‍ട്ടറില്‍ പെനാല്‍റ്റി സ്‌ട്രോക്കിലൂടെയാണ് ഇംഗ്ലണ്ട് സമനില പിടിച്ചത്. മൂന്നാം പോരാട്ടത്തില്‍ ഇന്ത്യ നാളെ ലോക ഒന്നാം നമ്പര്‍ ടീം ആസ്‌ത്രേലിയയുമായി ഏറ്റുമുട്ടും.