ദമസ്‌കസ്: സിറിയയില്‍ അധികാരം പിടിച്ചെടുത്ത വിമതരായ എച്ച്.ടി.എസ് ബശ്ശാറുല്‍ അസദിന്റെ പിതാവായ മുന്‍ പ്രസിഡന്റ് ഹാഫിസുല്‍ അസദിന്റെ മഖ്ബറക്ക് തീയിട്ടു. തുടര്‍ന്ന് ഇവിടെ എച്ച്.ടി.എസിന്റെ പുതിയ സിറിയന്‍ പതാകയും പ്രദര്‍ശിപ്പിച്ചു. തലസ്ഥാനം വിമതര്‍ കീഴടക്കിയ ശേഷവും സര്‍ക്കാര്‍ അനുകൂലികള്‍ക്ക് സ്വാധീനമുള്ള പടിഞ്ഞാറന്‍ സിറിയയിലെ ലതാക്കിയയിലാണ് വിമതര്‍ ആക്രമണം നടത്തിയത്. ബശ്ശാറുല്‍ അസദിന്റെ ജന്മനാടാണിത്. ഖര്‍ദാഹ ഗ്രാമത്തിലാണ് 2000 ത്തില്‍ അന്തരിച്ച ഹാഫിസുല്‍ അസദ് അന്ത്യവിശ്രമം കൊള്ളുന്നത്. 1971 മുതല്‍ 2000 വരെ അദ്ദേഹമായിരുന്നു സിറിയയുടെ പ്രസിഡന്റ്. തുടര്‍ന്നാണ് ബശ്ശാറുല്‍ അസദ് അധികാരത്തിലെത്തിയത്.

കുര്‍ദ് നേതൃത്വത്തിലുള്ള എസ്.ഡി.എഫ് സേനയുടെ നിയന്ത്രണത്തിലുള്ള കിഴക്കന്‍ നഗരമായ ദാറുല്‍ സൂറും വിമതര്‍ ഇന്നലെ കീഴടക്കി. സിറിയയിലെ എണ്ണപ്പാടങ്ങളുടെ കേന്ദ്രമാണിത്. സാമ്പത്തിക നിയന്ത്രണം കൂടി കൈവശപ്പെടുത്തുകയാണ് ലക്ഷ്യം. ഇവിടെ സര്‍ക്കാര്‍ കെട്ടിടത്തില്‍ വിമതരെത്തി നിയന്ത്രണം ഏറ്റെടുത്തു. വിമാനത്താവളവും പിടിച്ചെടുത്തു.