കോഴിക്കോട്: അഭിപ്രായ സ്വാതന്ത്ര്യമില്ലാത്തിടത്ത് സിനിമയും മേളകളുമുണ്ടാവില്ലെന്ന് പ്രമുഖ സംവിധായകന്‍ ടി.വി.ചന്ദ്രന്‍. സിനിമയെന്നാല്‍ അഭിപ്രായം പറയലാണ്. അഭിപ്രായങ്ങള്‍ക്ക് കൂച്ചുവിലങ്ങിടുന്ന സമീപനം പലയിടങ്ങളിലും വ്യാപിക്കുകയാണെന്നും അദ്ദേഹം പറഞ്ഞു. കോഴിക്കോട്ട് പ്രാദേശിക രാജ്യാന്തര ചലച്ചിത്രമേള ഉദ്ഘാടനം ചെയ്യുകയായിരുന്നു അദ്ദേഹം. പഴയകാലത്ത് ശക്തമായ പ്രതിരോധങ്ങളായാണ് സിനിമകള്‍ പുറത്തിറങ്ങിയിരുന്നത്. പുതിയ സിനിമകള്‍ അതിലും ശക്തായ പ്രതിരോധങ്ങള്‍ തീര്‍ക്കേണ്ടതുണ്ടെന്നും അദ്ദേഹം പറഞ്ഞു. ഏഴു ദിവസം നീളുന്ന രാജ്യാന്തരമേള കൈരളി, ശ്രീ തിയറ്ററുകളിലാണ് നടക്കുന്നത്. തിരുവനന്തപുരം അന്താരാഷ്ട്ര മേളയില്‍ പ്രദര്‍ശിപ്പിച്ച പ്രമുഖ ചിത്രങ്ങള്‍ ഇവിടെ പ്രദര്‍ശിപ്പിക്കും.
ചലച്ചിത്ര അക്കാദമി ചെയര്‍മാന്‍ കമല്‍ ചടങ്ങില്‍ അധ്യക്ഷത വഹിച്ചു. കൈതപ്രം ദാമോദരന്‍ നമ്പൂതിരി, പി.വി ഗംഗാധരന്‍, മീരാദര്‍ശക്, ജയശ്രീ കീര്‍ത്തി, വി.കെ.ജോസഫ്, ചെലവൂര്‍ വേണു, ഷാജുണ്‍, പ്രദീപ് ചൊക്ലി, മഹേഷ് പഞ്ചു സംസാരിച്ചു.