തിരുവനന്തപുരം: പാലായില്‍ 2017 ഒക്ടോബര്‍ 20 മുതല്‍ 23 വരെ നടന്ന സംസ്ഥാന സ്‌കൂള്‍ കായികോത്സവത്തിലെ മാധ്യമപുരസ്‌കാരങ്ങള്‍ പ്രഖ്യാപിച്ചു. മികച്ച പത്രറിപ്പോര്‍ട്ടിനുള്ള പുരസ്‌കാരം സുപ്രഭാതം സ്‌പോര്‍ട്‌സ് ലേഖകന്‍ യു.എച്ച് സിദ്ദീഖ് കരസ്ഥമാക്കി. രണ്ടാം തവണയാണ് സിദ്ദീഖിന് മികച്ച റിപ്പോര്‍ട്ടര്‍ക്കുള്ള സ്‌കൂള്‍ കായികമേളാ പുരസ്‌കാരം ലഭിക്കുന്നത്. 2012ലും സ്‌കൂള്‍ കായികമേളയിലെ മികച്ച റിപോര്‍ട്ടര്‍ക്കുള്ള പുരസ്‌കാരം ലഭിച്ചിരുന്നു. ഇടുക്കി വണ്ടിപ്പെരിയാര്‍ ഉരുണിയില്‍ പരേതനായ ഹംസയുടെയും ഖദീജയുടെയും പുത്രനാണ്. ഭാര്യ നിസ, മക്കള്‍: ഫിദ ഫാത്വിമ, ഫാദിയ ഫാത്വിമ.

മലയാള മനോരമയിലെ ജിബിന്‍ ചെമ്പോലയ്ക്കാണ് മികച്ച വാര്‍ത്താ ചിത്രത്തിനുള്ള പുരസ്‌കാരം. മികച്ച ടി.വി റിപ്പോര്‍ട്ടര്‍ ജോബി ജോര്‍ജ് (ഏഷ്യാനെറ്റ്), മികച്ച ഛായാഗ്രഹണം അഖില്‍ കെ. (മാതൃഭൂമി). ദേശാഭിമാനി പത്രത്തിനാണ് അച്ചടി മാധ്യമത്തിനുള്ള സമഗ്രകവറേജിനുള്ള പുരസ്‌കാരം. സമഗ്ര ദൃശ്യകവറേജിനുള്ള പുരസ്‌കാരം ഏഷ്യാനെറ്റും സ്വന്തമാക്കി. ആകാശവാണി തിരുവനന്തപുരം നിലയത്തിനാണ് മികച്ച ശ്രവ്യകവറേജിനുള്ള പുരസ്‌കാരം.

ഏപ്രില്‍ 13ന് തൃശൂര്‍ റീജിനല്‍ തിയറ്ററില്‍ ഉച്ചയ്ക്ക് രണ്ടിന് നടക്കുന്ന ചടങ്ങില്‍ പുരസ്‌കാരങ്ങള്‍ വിതരണം ചെയ്യും.