കല്‍പ്പറ്റ: കോഴിക്കോട് മെഡിക്കല്‍ കോളജ് ആശുപത്രിയില്‍ മൂന്ന് ദിവസത്തെ ചികിത്സക്ക് ശേഷം ഡിസ്ചാര്‍ജ് ചെയ്ത ആദിവാസി യുവതി തിരിച്ചുപോകുന്നതിനിടെ ഓടിക്കൊണ്ടിരുന്ന കെ.എസ്.ആര്‍.ടി.സി ബസില്‍ പ്രസവിച്ചു. അമ്പലവയല്‍ നെല്ലാറച്ചാല്‍ കോളനിയിലെ ബിജുവിന്റെ ഭാര്യ കവിതയാണ് ഇന്നലെ രാവിലെ ഒന്‍പതിന് കല്‍പ്പറ്റക്കടുത്ത് ചുണ്ടയില്‍ വച്ച് ബസില്‍ പ്രസവിച്ചത്. കോഴിക്കോട് മെഡിക്കല്‍ കോളജില്‍ നിന്ന് സുല്‍ത്താന്‍ ബത്തേരിക്ക് വരികയായിരുന്നു കവിതയും കുടുംബവും. കെ.എസ്.ആര്‍.ടി.സി ബസ് ജീവനക്കാരും യാത്രക്കാരും ചേര്‍ന്നാണ് ഇവരെ കല്‍പ്പറ്റയിലെ ലിയോ ആശുപത്രിയില്‍ എത്തിച്ചത്. അമ്മയും കുഞ്ഞും സുഖമായിരിക്കുന്നതായി ആശുപത്രി അധികൃതര്‍ പറഞ്ഞു.
ഗര്‍ഭിണിയായ കവിതയെ രക്തസമ്മര്‍ദം കൂടിയതിനെ തുടര്‍ന്നാണ് കോഴിക്കോട് മെഡിക്കല്‍ കോളജില്‍ പ്രവേശിപ്പിച്ചത്. കഴിഞ്ഞ ദിവസം വൈകുന്നേരം ഡിസ്ചാര്‍ജ് ചെയ്ത ശേഷം വാഹനം കിട്ടാത്തതിനാല്‍ ഇന്നലെ രാവിലെ കെ.എസ്.ആര്‍.ടി.സി ബസില്‍ വയനാട്ടിലേക്ക് പോരുകയായിരുന്നെന്ന് ബന്ധുക്കള്‍ പറഞ്ഞു. രാവിലെ ആറോടെ മെഡിക്കല്‍ കോളജില്‍ നിന്ന് പുറത്തിറങ്ങി എട്ട് മണിയോടെ കോഴിക്കോട് നിന്ന് സുല്‍ത്താന്‍ ബത്തേരിയിലേക്കുള്ള ബസില്‍ കയറി. ബസ് ചുരം കയറുമ്പോള്‍ കവിതക്ക് അസ്വസ്ഥതകള്‍ അനുഭവപ്പെട്ടിരുന്നു.
ചുണ്ടേല്‍ എത്തിയപ്പോഴേക്കും അസഹനീയമായ വേദനയും തുടങ്ങി. ഇത് ശ്രദ്ധയില്‍പെട്ട യാത്രക്കാര്‍ സഹായിക്കാന്‍ രംഗത്ത് വരികയായിരുന്നു.
കല്‍പ്പറ്റ കെ.എസ്.ആര്‍.ടി.സി ഗ്യാരേജിന് സമീപത്ത് എത്തിയപ്പോഴേക്കും യുവതി ഓടികൊണ്ടിരുന്ന ബസില്‍ തന്നെ പ്രസവിച്ചു. ഉടന്‍തന്നെ യാത്രക്കാരും ബസ് ജീവനക്കാരും ചേര്‍ന്ന് തൊട്ടടുത്ത ആശുപത്രിയില്‍ പ്രവേശിപ്പിക്കുകയായിരുന്നു.
അതിനിടെ കോഴിക്കോട് മെഡിക്കല്‍ കോളജില്‍ ചികിത്സയിലായിരുന്ന ഇവര്‍ ഡോക്ടറുടെ അനുമതിയില്ലാതെ പോവുകയായിരുന്നെന്നാണ് അധികൃതരുടെ വാദം.
കവിതക്ക് അടിയന്തര ധനസഹായമായി 5,000 രൂപ അനുവദിച്ചതായി ജില്ലാ കലക്ടര്‍ എസ് സുഹാസ് പറഞ്ഞു.
കല്‍പ്പറ്റയിലെ ആശുപത്രിയില്‍ സന്ദര്‍ശനം നടത്തിയ ശേഷമാണ് കലക്ടര്‍ ഇക്കാര്യം അറിയിച്ചത്.
യുവതിയുടെയും കുഞ്ഞിന്റെയും തുടര്‍ ചികിത്സ പൂര്‍ണമായും സര്‍ക്കാര്‍ ഏറ്റെടുക്കുമെന്ന് സി.കെ ശശീന്ദ്രന്‍ എം.എല്‍.എയും വ്യക്തമാക്കി.
ഉച്ചയോടെ ജില്ലയിലെത്തിയ കൃഷിമന്ത്രി വി.എസ് സുനില്‍കുമാറും കവിതയെയും കുഞ്ഞിനെയും സന്ദര്‍ശിച്ചു.