കൊച്ചി: ഒരു വാരം നീണ്ടുനിന്ന കൗമാര കായിക മാമാങ്കത്തിന് ഇന്ന് പരിസമാപ്തിയാകും. സംസ്ഥാന സ്‌കൂള്‍ കായികമേള അവസാനദിവസത്തിലേക്ക് കടക്കുമ്പോള്‍ 226 സ്വര്‍ണവും 149 വെള്ളിയും 163 വെങ്കലവും നേടി തിരുവനന്തപുരം ഓവറോള്‍ ചാംപ്യന്‍പട്ടം ഉറപ്പിച്ചു. 845 പോയിന്റുമായി രണ്ടാം സ്ഥാനത്ത് തൃശൂരും 769 പോയിന്റുമായി മലപ്പുറം മൂന്നാം സ്ഥാനത്തുമാണ്. 

ഗെയിംസ്, അക്വാട്ടിക്സ് വിഭാഗങ്ങളില്‍ ആധിപത്യം നേടിയാണ് തിരുവനന്തപുരത്തിന്റെ മുന്നേറ്റം. അത്ലറ്റിക്സ് ഇനങ്ങളില്‍ മലപ്പുറത്തിനാണ് ആധിപത്യം. 78 ഇനങ്ങളില്‍ മത്സരം പൂര്‍ത്തിയായപ്പോള്‍ 192 പോയിന്റുമായിട്ടാണ് മലപ്പുറം മുന്നേറുന്നത്. 169 പോയിന്റുമായി പാലക്കാട് രണ്ടാം സ്ഥാനത്തും 60 പോയിന്റുമായി കോഴിക്കോട് മൂന്നാം സ്ഥാനത്തുമാണ്. തിരുവനന്തപുരം നാലാം സ്ഥാനത്തും ആതിഥേയരായ എറണാകുളം അഞ്ചാം സ്ഥാനത്തുമാണ്.

 ഇന്ന് വൈകീട്ട് നാലിന് നടക്കുന്ന സമാപന ചടങ്ങില്‍ ഇതാദ്യമായി ഏര്‍പ്പെടുത്തിയ ചീഫ് മിനിസ്റ്റേഴ്സ് എവര്‍റോളിങ് ട്രോഫി മുഖ്യമന്ത്രി പിണറായി വിജയന്‍ ജേതാക്കള്‍ക്ക് സമ്മാനിക്കും.