വടകര: ടി.പി ചന്ദ്രശേഖരന്‍ വധക്കേസില്‍ ശിക്ഷിക്കപ്പെട്ട് ജയിലില്‍ കഴിയുന്ന പി.കെ കുഞ്ഞനന്തനെ ജയിലില്‍നിന്ന് മോചിപ്പിക്കാനുള്ള നീക്കത്തിന്റെ ഭാഗമായി സാമൂഹിക നീതി വകുപ്പ് ചന്ദ്രശേഖരന്റെ ഭാര്യ കെ.കെ രമയില്‍ നിന്നു മൊഴിയെടുത്തു. ഇന്നലെ വൈകിട്ട് 4.45 ഓടെയാണ് സാമൂഹിക നീതി വകുപ്പ് കോഴിക്കോട് ജില്ല പ്രബേഷന്‍ ഓഫിസര്‍ ഷീബ മുംതാസ് രമയെ കാണാന്‍ വീട്ടിലെത്തിയത്.
തനിക്ക് ഭീഷണി നിലനില്‍ക്കുന്നതായും ഈ സാഹചര്യത്തില്‍ മോചനം അനുവദിക്കുന്നത് അംഗീകരിക്കാന്‍ കഴിയില്ലെന്നും രമ മൊഴി നല്‍കി. കുഞ്ഞനന്തന്‍ ഉള്‍പ്പെടെയുള്ളവര്‍ ഇപ്പോള്‍ തന്നെ തനിക്കെതിരേ പ്രചാരണം നടത്തുന്നതായും രമ അറിയിച്ചു.
കൂടാതെ ടി.പി വധക്കേസിന്റെ അപ്പീല്‍ ഹൈക്കോടതിയുടെ പരിഗണനയിലാണ്. പ്രായം, പ്രതിയുടെ അനാരോഗ്യം എന്നിവ കാണിച്ച് പ്രതികള്‍ക്ക് ജയില്‍ചട്ടപ്രകാരം മോചനം അനുവദിക്കാം.
ഈ സാഹചര്യത്തിലാണ് മൊഴിയെടുത്തത്. കഴിഞ്ഞ ദിവസം പൊലിസ് ഇതേവിഷയത്തില്‍ രമയുടെ മൊഴിയെടുത്തിരുന്നു.