വടകര : ജെ.ടി റോഡില്‍ വടകര നഗരസഭ സ്ഥാപിക്കാനുദ്ദേശിച്ച മാലിന്യ സംഭരണ കേന്ദ്രത്തിനെതിരേയുള്ള സമരം വിജയത്തിലേക്ക്.
സീറോ വേസ്റ്റ് പദ്ധതിയുടെ ഭാഗമായി വടകര നഗരസഭയും തോടന്നൂര്‍ ബ്ലോക്ക് പഞ്ചായത്തും എം.ആര്‍.എഫ് സ്ഥാപിക്കാനുദ്ദേശിച്ച സ്ഥലങ്ങള്‍ അനുയോജ്യമല്ലെന്നും ഇത് മാറ്റി മറ്റൊരു സ്ഥലം കണ്ടെത്തണമെന്നും ജില്ലാ കലക്ടറുടെ ഉത്തരവ്. ഇന്നലെയാണ് ജില്ലാ കലക്ടറുടെ ഔദ്യോഗിക ഉത്തരവ് സമര സമിതിക്കാര്‍ക്ക് ലഭിച്ചത്. പ്രദേശങ്ങള്‍ നേരിട്ട് വന്ന് പരിശോധിച്ച ജില്ലാ കലക്ടര്‍ പദ്ധതിക്ക് അനുയോജ്യമായ രീതിയിലുള്ള മറ്റു സ്ഥലങ്ങളുണ്ടെന്നും ജനങ്ങളുടെ പ്രതിഷേധം കണ്ടില്ലെന്നു നടിക്കാനാവില്ലെന്നുമാണ് ഉത്തരവില്‍ പറയുന്നത്. വടകര നഗരസഭ എം.ആര്‍.എഫ് നിര്‍മിക്കാനുദ്ദേശിച്ച പ്രദേശം ജെ.ടി റോഡിലെ റെയില്‍വേ പുറംമ്പോക്ക് ഭൂമിയാണ്. ജനങ്ങള്‍ തിങ്ങിപ്പാര്‍ക്കുന്ന ഈ പ്രദേശത്ത് ഒരു അങ്കണവാടിയും മദ്‌റസയും പ്രവര്‍ത്തിക്കുന്നുണ്ട്. വടകര നഗരസഭയ്ക്ക് ഇതിലും അനുയോജ്യമായ സ്ഥലം ലഭ്യമാണെന്ന് ജില്ലാ കലക്ടര്‍ നേരിട്ടു നടത്തിയ അന്വേഷണത്തില്‍ ബോധ്യമായിട്ടുണ്ട്. അതേസമയം തോടന്നൂര്‍ ബ്ലോക്ക് എം.ആര്‍.എഫ് നിര്‍മിക്കാനുദ്ദേശിക്കുന്ന മണിയൂര്‍ പഞ്ചായത്തിലെ കുന്നത്തകരയിലും പ്രതിഷേധങ്ങള്‍ ഉയര്‍ന്നിട്ടുണ്ട്. ജില്ലാ കലക്ടര്‍ നേരിട്ട് സ്ഥലം സന്ദര്‍ശിക്കുകയും മണിയൂര്‍ പഞ്ചായത്തിലേതിനേക്കാള്‍ ബ്ലോക്ക് പരിധിയിലുള്ള ആയഞ്ചേരിയില്‍ അനുയോജ്യമായ സ്ഥലം ലഭ്യമാണെന്ന് ബോധ്യപ്പെടുകയും ചെയ്തു. ആയഞ്ചേരിയില്‍ വ്യവസായ ആവശ്യങ്ങള്‍ക്കായി ബ്ലോക്കിന്റെ കീഴിലുള്ള നാലേക്കര്‍ സ്ഥലത്ത് എം.ആര്‍.എഫ് അടക്കം ഗ്രീന്‍ പ്രൊഡക്റ്റ്‌സിനായി ഒരു മിനി ഇന്‍ഡസ്ട്രിയല്‍ എസ്‌റ്റേറ്റ് തന്നെ സ്ഥാപിക്കുന്നത് സംസ്ഥാനത്തിന് തന്നെ മാതൃകയാവുന്നതാണെന്നും അതിനാല്‍ രണ്ട് തദ്ദേശ സ്വയംഭരണ സ്ഥാപനങ്ങളും അനുയോജ്യമായ മറ്റൊരു സ്ഥലത്തേക്ക് എം.ആര്‍.എഫിനെ മാറ്റി സ്ഥാപിക്കണമെന്നും ജില്ലാ കലക്ടറുടെ ഉത്തരവില്‍ പറഞ്ഞു. എന്ത് വില കൊടുത്തും എം.ആര്‍.എഫ് കേന്ദ്രം ജെ.ടി റോഡില്‍ സ്ഥാപിക്കുമെന്ന് നഗരസഭ തീരമാനമെടുത്തതോടെയാണ് ജനകീയ സമരസമിതി രൂപീകരിച്ച് നാട്ടുകാര്‍ അനിശ്ചിതകാല റിലേ സത്യഗ്രഹ സമരത്തിന് തുടക്കമിട്ടത്. കേന്ദ്രത്തിന്റെ പ്രവൃത്തി ആരംഭിച്ച ദിവസം തന്നെ ഇവിടേക്ക് മാര്‍ച്ച് നടത്തിയ പൗരസമിതിയുടെ പ്രവര്‍ത്തകരെ പൊലിസ് അറസ്റ്റ് ചെയ്തിരുന്നു.
തുടര്‍ന്നാണ് അനിശ്ചിതകാല സത്യഗ്രഹത്തിന് സമരസമിതി തീരുമാനിച്ചത്. താല്‍കാലികമായി സംഭരണകേന്ദ്രം നാരായണനഗറിലെ മത്സ്യമാര്‍ക്കറ്റ് ബില്‍ഡിങ്ങിലേക്ക് മാറ്റിയിരുന്നു. എന്നാല്‍ സമരസമിതി സമരം തുടരുകയായിരുന്നു.
സമാനമായ രീതിയില്‍ തന്നെയായിരുന്നു തോടന്നൂര്‍ ബ്ലോക്ക് പഞ്ചായത്തിലും പ്രതിഷേധം ഉയര്‍ന്നു വന്നത്. എന്നാല്‍ തോടന്നൂര്‍ ബ്ലോക്ക് എം.ആര്‍.എഫ് സ്ഥാപിക്കാനുദ്ദേശിച്ച സ്ഥലം വര്‍ഷങ്ങള്‍ക്ക് മുന്‍പ് പട്ടയമായി നല്‍കിയതാണെന്നും സ്ഥലം സ്വകാര്യ വ്യക്തികളുടേതാണെന്ന വില്ലേജ് ഓഫിസറുടെ റിപ്പോര്‍ട്ട് ലഭിച്ചതിനെ തുടര്‍ന്ന് സമരസമിതി സമരം പിന്‍വലിച്ചിരുന്നു.