മാനന്തവാടി: മാനന്തവാടി-മൈസുരു റോഡിലെ രാത്രിയാത്രാ നിരോധന സമയം കുറക്കണമെന്നാവശ്യം ശക്തമാകുന്നു. നിലവില്‍ വൈകിട്ട് ആറുമുതലാണ് യാത്രാനിരോധനം ആരംഭിക്കുന്നത്. ഇത് ഒന്‍പത് മണി മുതലാക്കണമെന്നാവശ്യപ്പെട്ട് ജനകീയ പ്രതിഷേധം ശക്തമാക്കാന്‍ ഇതു സംബന്ധിച്ച് മാനന്തവാടിയില്‍ ചേര്‍ന്ന യോഗം തീരുമാനിച്ചു. 2008 ജൂണിലാണ് പാതയില്‍ നിരോധനം നിലവില്‍ വന്നത്. എന്നാല്‍ ഇതിനെതിരേ കാര്യമായ പ്രതിഷേധമുയര്‍ന്നിരുന്നില്ല. പ്രക്ഷോഭത്തിന് മുന്നോടിയായി ഏപ്രില്‍ആദ്യവാരം സ്ഥലം എം.എല്‍.എയുടെയും ജനപ്രതിനിധികളുടെയും സാന്നിധ്യത്തില്‍വിപുലമായ കണ്‍വന്‍ഷന്‍ വിളിച്ച് ചേര്‍ക്കും. തുടര്‍ന്ന് കര്‍ണാടക കേരള മുഖ്യമന്ത്രിമാരെ നേരില്‍ കണ്ട് നിവേദനം നല്‍കും. ബാവലി റോഡിലെ രാക്കുരുക്കിന് അറുതി വരുത്താന്‍ മൈസുരു, ബംഗളൂരു എന്നിവിടങ്ങളില്‍ രൂപീകരിച്ച അക്ഷന്‍ കമ്മിറ്റികളുടെ സഹകരണവും ഉറപ്പ് വരുത്താനും യോഗം തീരുമാനിച്ചു. ജനകീയ യോഗത്തില്‍ കടവത്ത് മുഹമ്മദ് അധ്യക്ഷനായി. കെ. ഉസ്മാന്‍, പി.വി.എസ്. മൂസ, ഇ.ജെ ബാബു, സണ്ണി ചാലില്‍, എന്‍.എ ഫൗലാദ്, സൂപ്പി പള്ളിയില്‍, സി. കുഞ്ഞബ്ദുല്ല, പി.വി മഹേഷ്, പി.വി പത്മനാഭന്‍, കെ.എം ഷിനോജ്, ബാബു ഫിലിപ്പ്, കെ. ജയേന്ദ്രന്‍, ഐസക്ക്മാനന്തവാടി, സിബി നെല്ലിച്ചുവട്ടില്‍, എ.വി മാത്യു, എം.കെ ഷിഹാബുദ്ദീന്‍ സംസാരിച്ചു.