ശംസുദ്ദീന്‍ ഫൈസി

മഞ്ചേരി: രാജ്യത്തെ ഇതര സംസ്ഥാനങ്ങളെയും ജില്ലകളെയും അപേക്ഷിച്ച് ജില്ലയില്‍ ക്ഷയരോഗബാധിതരുടെ എണ്ണത്തില്‍ കുറവെന്നു കണക്കുകള്‍. ഇന്ത്യയില്‍ ഒരു ദിവസം ആറായിരത്തിലേറെ പേരും ഒരോ അഞ്ചു മിനിറ്റിലും രണ്ടു പേരും ക്ഷയരോഗത്തിനു അടിമപ്പെട്ട് മരണപ്പെടുന്നതായാണ് കണക്കുകള്‍. സംസ്ഥാനത്ത് 2017ല്‍ റിപ്പോര്‍ട്ട് ചെയ്യപ്പെട്ട ക്ഷയരോഗികളുടെ എണ്ണം 19,553 ആണ്. അതേസമയം, ജില്ലയില്‍ 2016ല്‍ 1967 പേര്‍ രോഗ ബാധിതരായി ഉണ്ടായിരുന്നെങ്കില്‍ കഴിഞ്ഞ വര്‍ഷം 1751പേരായി ചുരുങ്ങിയിട്ടുണ്ട്. ഈ വര്‍ഷം ജനുവരിയില്‍ 151 പേരിലും ഫെബ്രുവരിയില്‍ 175 പേരിലും രോഗം കണ്ടെത്തി.
ഒട്ടേറെപേര്‍ കൃത്യമായ പരിശോധനകള്‍ക്കായി മുന്നോട്ടുവരുന്നതുകൊണ്ടും മെച്ചപ്പെട്ട പരിശോധന സംവിധാനങ്ങള്‍ ഉള്ളതിനാലുമാണ് ജില്ലയില്‍ ക്ഷയരോഗം നിയന്ത്രണ വിധേയമാകുന്നത്. ജില്ലയില്‍ 50 സെന്ററുകളിലായി ക്ഷയരോഗ പരിശോധന സംവിധാനങ്ങളുണ്ട്. രോഗനിര്‍ണയം നടത്തുന്നതിന് ജില്ലയില്‍ രണ്ട് കേന്ദ്രങ്ങളിലായി ആധൂനിക ക്ഷയരോഗ പരിശോധന ഉപകരണമായ സിബി നാറ്റ് മെഷീനും സ്ഥാപിച്ചിട്ടുണ്ട്.
തിരൂര്‍ ജില്ലാ ആശുപത്രിയിലും മഞ്ചേരി ചെരണി ജില്ലാ ടിബി സെന്ററിലുമാണ് ഇത്തരത്തിലുള്ള സജ്ജീകരണം ഒരുക്കിയിരിക്കുന്നത്. ജില്ലയില്‍ ക്ഷയരോഗം കണ്ടെത്തുന്നതിനും തുടര്‍ ചികിത്സക്കുമായി 2016ല്‍ 35,566 പേരും 2017ല്‍ 39,546പേരും ഈവര്‍ഷം 5009 പേരും കഫപരിശോധന നടത്താന്‍ മുന്നോട്ടുവന്നു.
അതേസമയം ജില്ലയില്‍ എം.ഡി.ആര്‍ ടി.ബി രോഗികളുടെ എണ്ണത്തില്‍ നേരിയ വര്‍ധനവുണ്ടായിട്ടുണ്ട്. സാധാരണ കഴിക്കുന്ന മരുന്നുകള്‍ കൃത്യമായി ഉപയോഗിക്കാതെ ഇടക്കു നിര്‍ത്തുന്നതു മൂലം ഉണ്ടാകുന്നതാണ് കൂടിയ ടിബി എന്നു പറയുന്ന മള്‍ട്ടി ഡ്രങ്ക് റസിസ്റ്റ്ന്റന്റ് ടി.ബി. 2014 ല്‍ അഞ്ചു പേരായിരുന്നു ജില്ലയിലെ എം.ഡി.ആര്‍ ടി.ബി ബാധിതര്‍. 2015 ല്‍ 12, 2016 ല്‍ 19 കഴിഞ്ഞ വര്‍ഷം 20 പേര്‍ എന്നീ തോതിലാണ് ജില്ലയില്‍ റിപ്പോര്‍ട്ട് ചെയ്യപ്പെട്ടത്.
പ്രമേഹം, മദ്യപാനം പുകയില ഉപയോഗം എച്ച്.ഐ.വി എന്നീ ഘടകങ്ങള്‍ രോഗ സാധ്യത വര്‍ധിപ്പിക്കുന്നതാണ്. പ്രമേഹ രോഗികളില്‍ ക്ഷയരോഗം സാധ്യത വളരെ കൂടുതലാണ്. കഴിഞ്ഞവര്‍ഷം ജില്ലയിലെ 348 പ്രമേഹ ബാധിതര്‍ ക്ഷയ രോഗികളായി കണ്ടെത്തിയിരുന്നു. പ്രമേഹ രോഗമുള്ളവര്‍ രോഗ ലക്ഷണം കണ്ടാല്‍ പരിശോധന നടത്തണമെന്നാണ് വകുപ്പിന്റെ നിര്‍ദേശം.