എരുമപ്പെട്ടി: എരുമപ്പെട്ടി മങ്ങാടില്‍ കിണറ്റിലെ വെള്ളം തിളച്ച് മറിയുന്നു. വീട്ടുകാര്‍ പരിഭ്രാന്തിയില്‍. മങ്ങാട് ചാത്തംകുളം റോഡില്‍ ഉപ്പത്ത് സദാനന്ദന്റെ പറമ്പില്‍ പുതിയതായി നിര്‍മിച്ച കിണറിലെ ജലമാണ് വലിയ കുമിളകളായി മുകളിലേക്ക് പൊന്തി വരുന്നത്.
പുതിയ വീട് നിര്‍മിക്കുന്നതിനു വേണ്ടി പറമ്പില്‍ ഒരു മാസം മുന്‍പാണ് കിണര്‍ കുഴിച്ചത്. കഴിഞ്ഞ ഞായറാഴ്ച മുതലാണ് വെള്ളം തിളച്ചുമറിയുന്നത് വീട്ടുകാരുടെ ശ്രദ്ധയില്‍പ്പെട്ടത്.
കിണറ്റില്‍ ഉറവ ഉണ്ടായതാണെന്നാണ് വീട്ടുകാര്‍ ആദ്യം ധരിച്ചത്. എന്നാല്‍ കിണറിലെ ജലത്തിന്റെ അളവ് വര്‍ധിക്കാത്തത് വീട്ടുകാരേയും നാട്ടുകാരേയും ഒരുപോലെ ഭയപ്പെടുത്തുകയാണ്.