കൊട്ടാരക്കര: ലോക ക്ഷീരദിനത്തില്‍ പുത്തൂര്‍ ആറ്റുവാശേരിയില്‍ സ്വകാര്യ ഫാമിലെ മൂന്ന് കറവപ്പശുക്കളെ വെട്ടിപ്പരുക്കേല്‍പ്പിച്ച സംഭവത്തില്‍ ജീവനക്കാരന്‍ പാങ്ങോട് താഴം ബിജുമന്ദിരത്തില്‍ ബിജു(39)നെ പുത്തൂര്‍ പൊലിസ് അറസ്റ്റ് ചെയ്തു. ഇയാളെ ഇന്ന് കോടതിയില്‍ ഹാജരാക്കും.
കോയിപ്പുറത്ത് വീട്ടില്‍ രാധാകൃഷ്ണപിള്ളയുടെ ഫാമിലെ പശുക്കളെയാണ് ബിജു കൊടുവാള്‍ കൊണ്ട് വെട്ടിയത്. എസ്.വി.എന്‍.എസ്.എസ് യു.പി സ്‌കൂളിന് സമീപത്തെ ഫാമിലുണ്ടായിരുന്ന അഞ്ച് പശുക്കളില്‍ ഒരു പശുവിന്റെ മുന്‍കാലിനും മറ്റൊന്നിന്റെ മുഖത്തുമാണ് വെട്ടിയത്. മറ്റൊരു പശുവിന്റെ വാല്‍ മുറിച്ചുമാറ്റിയ നിലയിലുമായിരുന്നു. ബുധനാഴ്ച പുലര്‍ച്ചെ കറവക്കാരന്‍ എത്തിയപ്പോഴാണ് ചോരയില്‍ കുളിച്ചുനിന്ന പശുക്കളെ കണ്ടത്. ഈ സമയം ഫാമിനോട് ചേര്‍ന്ന മുറിയില്‍ ഉറക്കത്തിലായിരുന്നു ജീവനക്കാരനായ ബിജു. കറവക്കാരന്‍ അറിയിച്ചതിനെ തുടര്‍ന്ന് ഉമസ്ഥന്‍ സ്ഥലത്തെത്തിയപ്പോഴേക്കും ബിജു രക്ഷപ്പെട്ടു. പരാതിയില്ലെന്നാണ് ഉടമസ്ഥന്‍ രാധാകൃഷ്ണപിള്ള പറഞ്ഞതെങ്കിലും പൊലിസ് കേസ് രജിസ്റ്റര്‍ ചെയ്യുകയായിരുന്നു. മുറിവേറ്റ് അവശനിലയിലായ പശുക്കളെ പിന്നീട് വെറ്ററിനറി ഡോക്ടമാരെത്തി ശുശ്രൂഷ നല്‍കി.
മെഡിക്കല്‍ ക്യാംപ്
കൊല്ലം: നെറ്റ് വര്‍ക്ക് ഫോര്‍ ഫിഷ് ക്വാളിറ്റി മാനേജ്‌മെന്റ് ആന്‍ഡ് സസ്‌റ്റൈനബിള്‍ ഫിഷിംഗിന്റെയും പൂക്കോട്ട് ചാരിറ്റബിള്‍ ട്രസ്റ്റും സംയുക്തമായി സംഘടിപ്പിക്കുന്ന സൗജന്യ മെഡിക്കല്‍ ക്യാംപ് എട്ടിന് രാവിലെ എട്ടു മുതല്‍ ഉച്ചക്ക് 12 വരെ അഴീക്കല്‍ പൂക്കോട്ട് കരയോഗം ഹാളില്‍ നടക്കും.