കോഴിക്കോട്: ജനദ്രോഹ നടപടികളിലൂടെ വഴിവിട്ട് പോകുന്ന കേന്ദ്ര ഗവണ്‍മെന്റിന് തൊഴിലാളികളും കര്‍ഷകരും വിദ്യാര്‍ഥികളും സാഹിത്യകാരന്‍ന്മാരും നടത്തുന്ന ഐതിഹാസിക പ്രക്ഷോഭങ്ങളാണ് ബദലെന്ന് മുഖ്യമന്ത്രി പിണറായി വിജയന്‍.
ജനങ്ങളെ ചേരി തിരിച്ചും വര്‍ഗീയ വികാരം ആളിക്കത്തിച്ചും ഭരണത്തില്‍ തുടരുന്ന ബി.ജെ.പി സര്‍ക്കാരിനെതിരേ ഈ ബദലാണ് ഉയര്‍ന്നു വരേണ്ടതെന്നും അദ്ദേഹം പറഞ്ഞു. കോഴിക്കോട്ട് സി.ഐ.ടി.യു ദേശീയ കൗണ്‍സിലിന്റെ സമാപന റാലി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
തൊഴിലാളികളും കര്‍ഷകരും സംഘടിതമായി നേടിയെടുത്ത അവകാശങ്ങള്‍ തട്ടിയെടുക്കാനാണ് ബി.ജെ.പി സര്‍ക്കാര്‍ ശ്രമിക്കുന്നത്. തൊഴില്‍ സ്ഥിരത ഇല്ലാതാക്കിയതിലൂടെ ചിന്തിക്കാന്‍ പോലും കഴിയാത്ത അറുപിന്തിരിപ്പന്‍ നടപടിയാണ് സ്വീകരിച്ചിരിക്കുന്നത്. കര്‍ഷകരുടെയും തൊഴിലാളികളുടെയും വിദ്യാര്‍ഥികളുടെയും ഐക്യം ഭയക്കുന്ന ബി.ജെ.പി സര്‍ക്കാര്‍ വര്‍ഗീയത ആളിക്കത്തിച്ചാണ് അതിനെ ഇല്ലാതാക്കുന്നത്. മതനിരപേക്ഷത സംരക്ഷിക്കാന്‍ തങ്ങള്‍ മതനിരപേക്ഷമാണെന്ന് പറഞ്ഞാല്‍ മാത്രം പോര. മതനിരപേക്ഷതയുടെ ശരിയായ ഉരക്കല്ല് വര്‍ഗീയതയോടുള്ള സമീപനമാണ്. രാജ്യത്ത് വര്‍ഗീയതക്കെതിരായ സമീപനം സ്വീകരിക്കേണ്ട ഒരു ഘട്ടത്തില്‍പോലും കോണ്‍ഗ്രസ് കൃത്യായ നടപടിയെടുത്തിട്ടില്ല.
ത്രിപുരയില്‍ നിയമസഭാ തെരഞ്ഞെടുപ്പില്‍ പ്രതിഫലിച്ചതും അതാണ്. കോണ്‍ഗ്രസിന്റെ അടിത്തറയാകെ ബി.ജെ.പിയിലേക്ക് പോയ പ്രതിഭാസമാണ് അവിടെ കണ്ടത്. ജനങ്ങളെ ചേരിതിരിച്ച് അധികാരം കയ്യാളാനുള്ള പ്രവര്‍ത്തനങ്ങള്‍ക്കെതിരേ യോജിച്ച ഐതിഹാസിക പ്രക്ഷോഭത്തിന് സജ്ജരാകണമെന്നും അദ്ദേഹം കൂട്ടിച്ചേര്‍ത്തു.
മന്ത്രി ടി.പി രാമകൃഷ്ണന്‍ അധ്യക്ഷനായ ചടങ്ങില്‍ സി.ഐ.ടി.യു ദേശീയ ജന. സെക്രട്ടറി തപന്‍സെന്‍, പ്രസിഡന്റ് ഡോ. ഹേമലത, വൈസ് പ്രസിഡന്റ് എ.കെ പത്മനാഭന്‍, സംസ്ഥാന ജന. സെക്രട്ടറി എളമരം കരീം, പ്രസിഡന്റ് ആനത്തലവട്ടം ആനന്ദന്‍, കെ. ചന്ദ്രന്‍ പിള്ള, ഡി.വൈ.എഫ്.ഐ അഖിലേന്ത്യാ പ്രസിഡന്റ് പി.എ മുഹമ്മദ് റിയാസ്, പി.കെ മുകുന്ദന്‍ തുടങ്ങിയവര്‍ സംബന്ധിച്ചു.