തൃശൂര്‍: വില്‍ക്കാനായി കൊണ്ടുവന്ന നക്ഷത്ര ആമകളുമായി നാലുപേരെ തൃശൂര്‍ ഫോറസ്റ്റ് ഫ്്‌ളയിങ് സ്‌ക്വാഡ് പിടികൂടി. ആലുവ വാപ്പാലകടവില്‍ അരുണ്‍(34), കോഴിക്കോട് പുല്ലൂരാംപാറ സ്വദേശി പുത്തന്‍പുരയില്‍ അനില്‍കുമാര്‍(28), തൃശൂര്‍ മുകുന്ദപുരം കൊച്ചുകടവ് സ്വദേശി താഴത്തുപുറത്ത് വീട്ടില്‍ വിജീഷ്(39), എറണാകുളം തുരുത്തിപുറം തിരുമ്മാശ്ശേരി വീട്ടില്‍ ബെന്‍സന്‍(28) എന്നിവരെയാണു പിടികൂടിയത്.
രഹസ്യ വിവരത്തെ തുടര്‍ന്ന് മാള അന്നമനടയില്‍ വച്ചാണു പ്രതികള്‍ വലയിലായത്. ഇവര്‍ സഞ്ചരിച്ചിരുന്ന കാറും കസ്റ്റഡിയിലെടുത്തിട്ടുണ്ട്. രണ്ട് പേര്‍ ഉദ്യോഗസ്ഥരെ കണ്ട് ഓടി രക്ഷപ്പെട്ടു. ഇവര്‍ക്കായുള്ള തിരച്ചില്‍ തുടരുകയാണ്.
പിടിയിലായവര്‍ ഇടനിലക്കാരാണ് . എട്ടു ലക്ഷം പ്രതിഫലത്തിനാണു ഇവര്‍ കച്ചവടത്തിനു ഇറങ്ങിത്തിരിച്ചത്. അന്നമനടയില്‍ വാങ്ങാനുള്ളവര്‍ വരുമെന്ന നിര്‍ദേശം അനുസരിച്ചാണ് ഇവര്‍ എത്തിയത്. രണ്ടു വലിയ ആമകളെ ബാഗിലാണു സൂക്ഷിച്ചിരുന്നത്. വിദേശത്തു ഇതിനു കോടികളുടെ മോഹവിലയാണ്.