ഓക്ക്‌ലന്‍ഡ്: ഇംഗ്ലണ്ടിനെതിരായ ഒന്നാം ക്രിക്കറ്റ് ടെസ്റ്റില്‍ ന്യൂസിലന്‍ഡിന് ഇന്നിങ്‌സ് വിജയം. ഇന്നിങ്‌സിനും 49 റണ്‍സിനുമാണ് കിവികള്‍ വിജയം സ്വന്തമാക്കിയത്. ഇംഗ്ലണ്ടിന്റെ ഒന്നാം ഇന്നിങ്‌സ് 58 റണ്‍സില്‍ അവസാനിപ്പിച്ച ന്യൂസിലന്‍ഡ് ഒന്നാം ഇന്നിങ്‌സില്‍ എട്ട് വിക്കറ്റ് നഷ്ടത്തില്‍ 427 റണ്‍സെന്ന നിലയില്‍ ഡിക്ലയര്‍ ചെയ്തു. 369 റണ്‍സ് കടവുമായി രണ്ടാം ഇന്നിങ്‌സ് ബാറ്റിങിനിറങ്ങിയ ഇംഗ്ലണ്ടിന്റെ പോരാട്ടം 320 റണ്‍സില്‍ അവസാനിപ്പിച്ചാണ് ന്യൂസിലന്‍ഡ് ഇന്നിങ്‌സ് വിജയം പിടിച്ചെടുത്തത്.
അവസാന ദിനത്തില്‍ മത്സരം സമനിലയിലെത്തിക്കാനുള്ള ശ്രമം ഇംഗ്ലീഷ് സംഘം നടത്തിയെങ്കിലും മൂന്ന് വീതം വിക്കറ്റെടുത്ത് ട്രെന്റ് ബോള്‍ട്ട്, വാഗ്നര്‍, ടോഡ് ആസ്‌ലെ എന്നിവര്‍ ചേര്‍ന്ന് അവരുടെ മോഹം അവസാനിപ്പിക്കുകയായിരുന്നു.
ആദ്യ ഇന്നിങ്‌സില്‍ കൂട്ടത്തകര്‍ച്ച നേരിട്ട ഇംഗ്ലീഷ് ബാറ്റിങ് നിര രണ്ടാം ഘട്ടത്തില്‍ പിടിച്ചുനില്‍ക്കാനുള്ള ആര്‍ജവം കാണിച്ചു. സ്റ്റോണ്‍മന്‍ (55), ക്യാപ്റ്റന്‍ ജോ റൂട്ട് (51), ബെന്‍ സ്റ്റോക്‌സ് (66), ക്രിസ് വോക്‌സ് (52) എന്നിവര്‍ അര്‍ധ സെഞ്ച്വറി നേടി.
നേരത്തെ നിക്കോള്‍സ് (പുറത്താകാതെ 145), ക്യാപ്റ്റന്‍ കെയ്ന്‍ വില്ല്യംസന്‍ (102) എന്നിവരുടെ സെഞ്ച്വറി കരുത്തിലാണ് ന്യൂസിലന്‍ഡ് മികച്ച സ്‌കോര്‍ സ്വന്തമാക്കിയത്. ആദ്യ ഇന്നിങ്‌സില്‍ ആറ് രണ്ടാം ഇന്നിങ്‌സില്‍ മൂന്ന് വിക്കറ്റുകള്‍ വീഴ്ത്തി മൊത്തം ഒന്‍പത് വിക്കറ്റുകള്‍ പിഴുത ട്രെന്റ് ബോള്‍ട്ടാണ് കളിയിലെ കേമന്‍.