കോഴിക്കോട്: കീഴാറ്റൂര്‍ സമരത്തിനു പിന്നില്‍ രാഷ്ട്രീയ കിളികളാണെന്ന് സാഹിത്യകാരന്‍ എം. മുകുന്ദന്‍. ബി.ജെ.പിയുടെ കിളികള്‍ പറക്കുന്ന സ്ഥലത്ത് എങ്ങനെയാണ് നില്‍ക്കുകയെന്നും അദ്ദേഹം കോഴിക്കോട്ട് മാധ്യമ പ്രവര്‍ത്തകരോട് ചോദിച്ചു.
സംസ്ഥാനത്തുടനീളം അടിസ്ഥാന വികസനം ചര്‍ച്ചയായി ഉയര്‍ന്നുവരാന്‍ കീഴാറ്റൂര്‍ സമരം കാരണമാകും. വികസനത്തിന്റെ ഭാഗമായി റോഡുകള്‍ കൂടിയേ തീരൂ. മറുഭാഗത്ത് പാടങ്ങളും തണ്ണീര്‍ത്തടങ്ങളും സംരക്ഷിക്കപ്പെടുകയും വേണം.
മറ്റു സംസ്ഥാനങ്ങളില്‍ വലിയ വികസനമുണ്ടാകുമ്പോള്‍ കേരളത്തില്‍ ഇതിനെ സംബന്ധിച്ച് തുറന്ന ചര്‍ച്ച വേണമെന്നും അദ്ദേഹം പറഞ്ഞു. ഗുരുവായൂര്‍ ക്ഷേത്രദര്‍ശനത്തില്‍ നിന്ന് യേശുദാസിനെ മാറ്റി നിര്‍ത്തരുത്. അമ്പലങ്ങളില്‍ എല്ലാവര്‍ക്കും കയറാനാകണമെന്നാണ് തന്റെ അഭിപ്രായമെന്നും എം. മുകുന്ദന്‍ സൂചിപ്പിച്ചു.