തൊടുപുഴ: പരീക്ഷക്കാലം പിന്നിട്ടിട്ടും സംസ്ഥാനത്തെ വൈദ്യുതി ഉപഭോഗത്തില്‍ കുറവില്ല. പ്രതിദിന ഉപഭോഗം 80 ദശലക്ഷം യൂനിറ്റിലേക്ക് അടുക്കുകയാണ്. 79.25 ദശലക്ഷം യൂനിറ്റായിരുന്നു ഇന്നലെ രാവിലെ എട്ടിന് അവസാനിച്ച 24 മണിക്കൂറിലെ ഉപഭോഗം.
ഇപ്പോള്‍ കഴിഞ്ഞ വര്‍ഷത്തെ റെക്കോര്‍ഡ് തകര്‍ത്തിരിക്കുകയാണ്. 2017ലെ കൂടിയ പ്രതിദിന വൈദ്യുതി ഉപഭോഗം 77.58 ദശലക്ഷം യൂനിറ്റായിരുന്നു. 2016 ഏപ്രില്‍ 26നായിരുന്നു ചരിത്രത്തിലെ ഉയര്‍ന്ന ഉപഭോഗം രേഖപ്പെടുത്തിയത്, 80.6 ദശലക്ഷം യൂനിറ്റ്. ഇങ്ങനെ പോയാല്‍ ഇക്കുറി ഈ റെക്കോര്‍ഡ് ഭേദിക്കുമെന്നാണ് വിലയിരുത്തല്‍.
അന്തരീക്ഷത്തില്‍ മഴക്കാറുള്ളതിനാല്‍ ശക്തമായ ചൂടാണ് അനുഭവപ്പെടുന്നത്. ഇത് എര്‍കണ്ടീഷണറുകളുടെ ഉപയോഗത്തില്‍ വന്‍ വര്‍ധനവ് ഉണ്ടാക്കിയിരിക്കുകയാണ്. 2017ല്‍ അണക്കെട്ടുകളില്‍ ജലനിരപ്പ് കുത്തനെ താഴ്ന്നതിനാല്‍ വാട്ടര്‍ അതോറിറ്റിയുടെ പല പദ്ധതികള്‍ക്കും താഴിട്ടിരുന്നു. എന്നാല്‍ ഇക്കുറി ജലശേഖരം തൃപ്തികരമായതിനാല്‍ പമ്പിങ് പൂര്‍ണതോതില്‍ നടക്കുന്നുണ്ട്. ഇതു വൈദ്യുതി ഉപഭോഗം ഉയരാന്‍ ഒരു കാരണമായെന്നാണ് കെ.എസ്.ഇ.ബി ലോഡ് ഡെസ്പാച്ച് സെന്ററിന്റെ വിലയിരുത്തല്‍.
എസ്.എസ്.എല്‍.സി, പ്ലസ്ടു പരീക്ഷകള്‍ അവസാനിക്കുന്നതോടെ വൈദ്യുതി ഉപഭോഗത്തില്‍ കുറവുണ്ടാകുമെന്നായിരുന്നു കണക്കുകൂട്ടല്‍.
എന്നാല്‍ ഇപ്പോള്‍ കണക്കുകൂട്ടലുകള്‍ തെറ്റിച്ച് ഉപഭോഗം കുതിക്കുകയാണ്. പരീക്ഷാ ദിവസങ്ങളില്‍ ശരാശരി 74-76 ദശലക്ഷം യൂനിറ്റായിരുന്നു ഉപഭോഗം. പരീക്ഷ അവസാനിച്ച ഇന്നലെ ഉപഭോഗം 79.25 ദശലക്ഷം യൂനിറ്റ് രേഖപ്പെടുത്തിയത് കെ.എസ്.ഇ.ബിയെ ആശങ്കപ്പെടുത്തിയിട്ടുണ്ട്.
കേന്ദ്ര വിഹിതവും പവര്‍ പര്‍ച്ചേഴ്‌സ് എഗ്രിമെന്റ് പ്രകാരമുള്ള വൈദ്യുതിയും തടസമില്ലാതെ ലഭിക്കുന്നതിനാല്‍ നിലവില്‍ പ്രശ്‌നങ്ങളൊന്നുമില്ല. 25.062 ദശലക്ഷം യൂനിറ്റാണ് ഇന്നലത്തെ ആഭ്യന്തര ഉല്‍പാദനം.
54.134 ദശലക്ഷം യൂനിറ്റ് പുറത്തുനിന്ന് എത്തിച്ചു. മൊത്തം സംഭരണശേഷിയുടെ 47 ശതമാനം ജലം ഇപ്പോള്‍ എല്ലാ അണക്കെട്ടുകളിലുമായുണ്ട്.
1931.864 ദശലക്ഷം യൂനിറ്റ് വൈദ്യുതി ഇത്രയും വെള്ളം കൊണ്ട് ഉല്‍പാദിപ്പിക്കാം.
കഴിഞ്ഞ വര്‍ഷം ഇതേദിവസത്തേക്കാള്‍ 630.78 ദശലക്ഷം യൂനിറ്റ് അധികമാണിത്. മാര്‍ച്ച് ഒന്നു മുതല്‍ 31 വരെ പ്രതീക്ഷിക്കുന്ന നീരൊഴുക്ക് 104.788 ദശലക്ഷം യൂനിറ്റിനുള്ളതാണ്. അതേസമയം 99.39 ദശലക്ഷം യൂനിറ്റിനുള്ള വെള്ളം ഇന്നലെ വരെ അണക്കെട്ടുകളില്‍ എത്തിയിട്ടുണ്ട്.